【潮玩香港】土豪級全新影院體驗 - The Metroplex 星影匯

照片來源: The Metroplex

Weekend 落雨，有咩節目好得過睇戲﹖﹗最近香港新戲院開不停，星期日就去左位於九龍灣國際展貿中心 E-Max 商場地下嘅 The Metroplex - 星影匯試下。

星影匯一共有 9 個影院，最特別嘅地方係其中 3 個院為 VIP 貴賓影院，每個院只設有 20 個座位。 VIP 影院票價為 HKD200，價錢包括餐飲。第一時間可能會覺得好貴，但諗深一層，平時一般戲院睇 3D 戲都要百幾蚊啦﹗兩舊水有土豪級享受，有野食有野飲，再加上星影匯做緊 promotion，享戲票有四小時免費泊車，其實都幾抵﹗

持戲票享有四小時免費泊車優惠，即使睇片長三個幾鐘嘅戲都唔洗趕住去攞車

戲院大堂以金銅色設計，氣派十足﹗左邊為售票處。

大堂正中央放左一個超大型電視屏，兩側為自助取票機，非常 impressive﹗

小食部設於戲院大堂右邊，除左一般爆谷薯片之外，仲有出售松露粒薯條﹑Panini﹑紅白酒同啤酒﹗

當日叫左杯紅酒，質素一般，但 HKD45 一杯，都唔會抱有咩要求﹗睇住戲，飲番杯酒，感覺一流﹗

洗手間設於小食部旁邊，好大間，燈光明亮，乾淨整齊﹗

通過時光隧道般嘅影院入口，盡頭又放置左另一個超大型電視屏

戲院通道以木色為主，入面好大，經過九曲十三彎終於行到 VIP 影院

星影匯設有 3 個 VIP 影院

由於當日已經有其他人入左場，所以無影相，只好借用一下官方相片。VIP 影院只設有 20 個座位，由 B 行開始。前兩排各設三 pair 座位，而最後排就係一行八個相連座位。座位空間感十足，同其他前後左右座位都有一段距離，絕對唔會受他人打擾。

震動座椅以真皮梳化設計，更可以調校角度，攤喺度睇都得，非常舒適。

影院更設有杜比全景聲 (Dolby Atmos) 音響系統，除左一般前後左右喇叭，就連天花板上面都有，完美打造具臨場感嘅音效享受，實在有聲歷其境嘅感覺。

影院投影器為3D及4K投影機，清晰度、亮度都係極高品質，畫面相當震撼﹗

兩個座位中間有一張用喺放餐飲嘅小桌。開場前，職員會續一過嚟為客人點餐﹗
(明明上網買飛嘅時候已經選好左﹗)

電影開始左大約 10-15 分鐘，職員就送上左一個石班魚柳便當，有汁煮石班魚柳﹑沙律﹑泡芙﹑炸薯粒等，味道相當不錯，但如果食物可以喺剛開場嘅時候送上會更加好。

順帶一提，如果兩個人去，VIP 影院嘅 best seat 一定係 B3﹒B4﹗ 驟眼睇戲院每一行嘅高度間距唔係話高好多，如果前面果行嘅觀眾攤低梳化的話，後面嘅觀眾較低梳化好可能會被檔住銀幕，所以 B 行嘅體驗應該會比後排坐位好。

兩小時嘅 3D 電影，轉眼間就完左。睇完戲出嚟，更加唔會有腰酸背痛嘅感覺。可以攤喺度睇好戲﹑飲住紅酒歎美食嘅體驗實在令我念念不忘﹗我估以後要睇 3D 戲的話，星影匯 VIP 影院一定係我嘅 first choice﹗

The Metroplex 星影匯

地址：香港九龍灣展貿徑1號九龍灣國際展貿中心 E-Max 地下
官方網頁：http://www.metroplex.com.hk/zh_tw/home