參觀過古芝地道同戰爭博物館之後，心入面真係會有一種好不安嘅感覺，唔明白點解國家之間要用戰爭嚟解決問題，而唔理會國家人民嘅死活。古芝地道結構同建築嘅複雜程度，實在令人驚訝，如果唔係因為戰爭，越南人嘅刻苦加上智慧，會唔會已經令佢地脫離發展中國家嘅痛苦﹖戰爭博物館入面見到一張又張戰爭同戰後嘅相，實在應該慶幸自己無需要面對戰爭﹗但係…參觀過兩個同戰爭有關嘅景點之後，令我最深印象的… 係導遊最後講嘅幾句說話﹗
參加 The Sinh Tourist 嘅 1 day tour，可以一次過去參觀古芝地道同戰爭博物館。
古芝地道係胡志明市三大遺跡之一，由胡志明市坐車去要兩個鐘車程，係越戰果陣越軍嘅地下本部，如同一條地下村。
古芝地道全長 250 公里，深入地底4公尺以下，南通西貢河，西邊可達高棉。地道分三層，以交錯方式層層相通，由 1940 年開始挖掘，直至越戰結束為止﹗最重要嘅係當時科技並唔發達，亦無咩工具，就只係靠每人一對手﹑一把鏟同一個籮慢慢挖掘左廿年。
地道結構非常複雜，機關陷阱重重，而且五臟俱全，水井、餐廳、廚房、手術室、休息室、會議室、醫療室、地下防空洞、糧食軍火庫、婦女待產室，基本上同一個結構完整嘅城市無分別！ 出入只係僅僅夠一個人落去，肥 D 都可能入唔到﹗
地道漆黑一片，又矮又窄，一定要彎低身先行到，潮濕嘅地底令地道散發住一股霉味，行 5 分鐘都嫌多，實在不能夠想像以前越南人點可以喺地道入面生活，有 D 人更喺地道入面生活左十幾年﹗而廚房排煙口亦經過特別設計，外面完全唔會察覺得到。越軍日頭就係咁躲喺地道之下， 夜晚先出嚟伏擊。
地道每層出入口更 set 好左好多陷阱，確保安全﹗
古芝地道參觀到最後就可以一試越南人喺戰爭期間嘅唯一食物 - 樹薯，因為易種而且飽肚，﹗將樹薯蒸熟之後沾花生粉，基本上係完全無味道﹗
去完古芝地道，就去參觀戰爭博物館。一向不太喜歡去博物館嘅我，去到戰爭博物館特別留心，仔細睇每一樣展品同相，望住滿身著火嘅小朋友﹑美軍化學武器，毒氣滲透入泥土再令水帶毒，初生畸型嘅 BB 等，感覺好心寒，毛骨慄然﹗究竟戰爭帶來的除左傷害，仲有 D咩﹖
解散前，導遊 recap 一下整日嘅行程，之後講左一句『People in Vietnam always smile』，簡簡單單的一句，再補充請大家唔好用憐憫嘅眼光看越南人，因為佢地好堅強，想表達支持的話，一個微笑就可以﹗呢一段說話俾我嘅印象非常深刻﹗
Posts
No comments:
Post a Comment