【台北】街市後的隱蔽花園 - 小路咖啡 dearDeer

台北台電大樓站、古亭、師大夜市附近一帶近年開左好多 cafe，而且每間都有自己獨特嘅風格。

小路咖啡 dearDeer 隱身喺菜市場後面靜巷嘅住宅區入面。當日沿住地址一路行，行行下竟然入左個菜市場，真係以為自己抄錯地址。誰不知一轉角，就見到一棟地下裝修得比較特別嘅住宅，正是小路咖啡嘅所在。 小路咖啡由舊公寓住宅改裝而成，無明顯招牌，只係喺窗上面寫著店名「dearDeer小路」。

小路咖啡 dearDeer

小路咖啡嘅門口並唔係右邊嘅白色大門，而係響右邊嘅小窄巷。

當日係假日下午，室內座位已經爆滿，好彩 cafe 後面嘅開放式戶外空間仲有位。室內座位排得比較密，相比之下，天氣好嘅話坐外面會舒服 D，有較大嘅空間感。小路咖啡用上水泥地﹑木質傢俱擺設﹑懷舊嘅檯檯櫈櫈，充滿住復古味道。由於當日人多，而小好啡其中一項規條係「不拍到人﹑不打擾人﹑不到別人的座位拍攝」，所以要睇室內嘅相，請自行 Google Search﹗^^

小路咖啡嘅消費方式係入場收費制，一張票 NT250，有五點可以用嚟消費，唔夠都可再買，而且無使用期限限制，下次入場可以再用。當日買左兩張票，有十點﹗Order 左兩杯咖啡同兩份 cake，剛好用完。門票係蝴蝶卡設計，非常靚，記得要拎走收藏呀﹗

小路咖啡嘅 Menu上列出左七大勾勾約定，記得一定要遵守，唔好破壞小路咖啡嘅氣氛﹗特別係門口已經寫住嘅一句話：「小路是大家的秘密基地，說話談天要小小聲喔﹗」

 Menu 上面嘅飲品同食物名都超可愛例如「比較酷的黑芝麻燻雞三明治」﹑「可能週末才會有的大人口味的手作布丁」，好有心思。當日就點左「孩子氣的起士蛋糕」﹑「加一點冰淇淋的布朗尼」﹑「草地上的小兔」﹑「森林咖啡」﹗甜點唔係每日都有，有需要嘅話可以先問一下店員。

 「草地上的小兔」- 其實係抹茶牛奶，超級可愛，可惜味道偏淡，不過齋睇個樣都值回票價啦﹗

「加一點冰淇淋的布朗尼」- 手工製作甜品，布朗尼蛋糕加熱過，加上核桃，配上雲尼拿雪糕，冷熱交融雙重口感。一份有六粒，食完真係想再 encore 多份。

 

 

 「孩子氣的起士蛋糕」- 濃郁起士味，而且係我最愛…有餅底嘅做法﹗

小路咖啡係一間非常舒服嘅 cafe，由老屋改造，老傢俱營造出復古感。而且大家都好遵守約定，非常安靜。如果你想搵個地方安安靜靜睇下書、上網，甚至係發吽哣都可以嚟呢度﹗唔覺唔覺，可能就消磨左一個下午。

 

 

小路咖啡 dearDeer

地址：台北市羅斯福路2段77巷7號1樓 (捷運古亭站)

電話：(02) 2363-7768

營業時間：13:00-22:00 (週一公休)