【台北】人氣長龍鬆餅 - 米朗琪咖啡館

早前咖啡弄喺香港開店，每日都要排隊先食到，最近更於尖沙咀開設分店﹗假若你去咖啡弄係為左食鬆餅，我覺得位於台灣中山捷運站附近嘅米朗琪咖啡館更加好食。

只要喺出左捷運站 2 號出口，見到麥當勞左轉入去，再喺 16 巷右轉，你就會見到一大班人企晒喺度等，亦代表你已經到左米朗琪﹗呢個時候，你應該要 9 秒 9 衝去拎張飛先﹗

當日去到見到米朗琪出面企左幾十人，大約要等二十個 number 倒，就去左附近小巷兜個圈打發時間﹗點知… 行到返去嘅時候，竟然已經過左兩個 no.，果一刻真係失望到爆炸﹗因為米朗琪規定如果號碼過左，就一定要重排。(建議大家拎左飛就唔好亂走喇﹗)

好想放棄，但既然一場嚟到，就乖乖再拎過張飛等啦﹗好彩過左大約十五分鐘，店員詢問有無唔介意坐外面吧檯嘅人客﹗被安排到二號店外面嘅吧檯位置，個人覺得比起店內更舒服﹗

二話不說，即刻點左花茶同鬆餅﹗雖然米朗琪嘅草莓鬆餅特別出名，但我真係對士多啤利無咩興趣，所以最後就點左抹茶紅豆口味﹗

抹茶紅豆鬆餅 NT140

四大塊厚鬆餅，配一球抹茶雪糕同埋一球紅豆蓉，再加上及 fresh cream，份量好大。

鬆餅外脆內軟。外層烤焗得好酥脆，而內層則好香雞蛋味﹗鬆餅入面並唔係空心嘅，口感紮實﹗咁香嘅鬆餅配上抹茶味濃嘅雪糕同埋食得到原粒紅豆嘅紅豆蓉，唔會太甜，熱鬆餅加上冰凍雪糕，冷熱交迭，味道配搭恰到好處，非常好食﹗

熱水果茶 NT130

台灣嘅熱水果茶真係令人百喝不厭。米朗琪咖啡館嘅水果茶選用當季新鮮水果現泡製作，茶壺入面放滿左新鮮水果，包括熱情果、蘋果、橘子、青檸等﹗入口果味濃郁，香甜之餘，亦帶一點點酸，非常解渴﹗

米朗琪咖啡館無時無刻都吸引左排隊人龍，當中嘅原因好簡單，就係因為米朗琪嘅鬆餅同飲品真係比其他 cafe 好食﹗雖然等左差唔多一個鐘，但係離開米朗琪嘅時候感覺真係好滿足﹗食物好食之餘，服務更加應該要大讚一下﹗即使店入面忙得不可交加，店員依然服務態度依然非常好，而且非常細心﹗

米朗琪咖啡館

地址:台北市中山北路二段16巷23號
電話:(02)2567-3787
官方網頁：http://melangecafe.com.tw/