【台北】2014 限定 - 貓空纜車 x Hello Kitty

貓空纜車 x Hello Kitty

總係覺得 Hello Kitty 無處不在，Hello Kitty 彩繪機﹑Hello Kitty主題餐廳﹑Hello Kitty 主題樂園、Hello Kitty 特展… 永遠只有一個感覺，有 Hello Kitty 嘅地方都好多人﹗

估唔到貓空纜車因為參觀人數一直下跌，2014年竟然搵 Hello Kitty 嚟刺激一下人流。去過 N 次貓空，雖然我絕非 Hello Kitty 迷，但2014 年竟然因為 Hello Kitty 所以想再去睇下。

貓空纜車嘅 145 卡車廂全部換裝，變身成四款 Hello Kitty 造型嘅彩繪專車 – 放大鏡探險家Hello Kitty﹑貓熊圓仔與Hello Kitty﹑指南宮保庇 Hello Kitty 同埋喝茶趣 Hello Kitty。除左車廂，站入面一樣係 Hello Kitty 無處不在，無論係售票機、電梯定廁所告示都貼滿左 Hello Kitty﹗假如你見到 Hello Kitty係會反感至嘔嘅話，我建議你 2014 年 12 月 5 號之前都唔好去搭貓空纜車﹗不過如果有小朋友又或者酷愛 Hello Kitty 嘅男女朋友，就必定要去兜番轉﹗

都未行到入貓空纜車嘅動物園站，你就已經會見到大樓外面有一條極大 Hello Kitty Banner﹗(臨走可以去動物園站旁邊更加設有精品店，出售貓空纜車 x Hello Kitty 活動限定精品，Hello Kitty 迷應該又要大出血啦﹗)

行多兩步就已經見到貼滿 Kitty 嘅售票機﹗

上樓上搭纜車，沿路只要你唔係合埋眼嚟行，你就會發現左左右右全都被 Hello Kitty 包圍。

 

因為 Hello Kitty 又掀起左搭貓纜嘅熱潮，所以好多人，而且選擇水晶車廂嘅人都較多，所以假日等候時間特別長。建議先到貓空纜車網路預約系統預約，系統會顯示每日一般車廂同埋水晶車廂嘅剩餘座位，可以預約一個月內嘅乘搭時間。只要喺預約搭乘時間前15分鐘報到，就唔怕浪費左寶貴嘅時間去排隊啦﹗

雖然有預約乘搭貓纜之眼水晶車廂，不過當日因為早左到，而且之前已經搭過水晶車廂，所以就再無突登去排隊。

「貓空纜車 x Hello Kitty」終於嚟喇！ 當日搭嘅係橙色茶壺造型 Hello Kitty纜車。
 (除左藍色係貓纜之眼水晶車廂之外，其餘嘅都係一般車廂。)

車廂入面會有唔同 Hello Kitty & Friends 嘅圖案，纜車上落山時依靠著玻璃拍照，會好似同 Hello Kitty & Friends 合照一樣。

一般車廂可以坐 6-8位，而水晶車廂就係5位，人多嘅時候一般都要同其他人 share 一個車廂。當日就同一個家庭搭同一卡，一上到纜車除左小朋友興奮到亂叫之外，就係相機快門按個不停﹗

 

當日嘅天氣一般，而且係冬天，所以風景唔係好靚。但之前夏天同秋天嚟嘅時候風景一流。

搭左差唔多二十幾分鐘，終於到左終點站貓空。

 就連貓空站嘅站牌都被 Hello Kitty 攻佔左﹗

上到貓空有咩好做，相信唔需要再特別介紹。喜歡歎茶嘅朋友不彷搵間露天茶居泡番壺茶，一路歎下茶，一路居高臨下欣賞下山景。如果想歎番杯咖啡﹖特別推薦貓空閒 Cafe。

 貓空閒係路旁嘅一間露天 cafe，出左貓空站轉左邊，一直行就一定會見到。

貓空閒係一間咖啡車小店，咖啡車旁邊放左幾張桌椅，係睇風景嘅好地方。坐喺度點一杯咖啡﹑水果茶，再加上鬆餅，真係咩壓力都無晒，心情好輕鬆，真正體會到偷得浮生半日閒嘅感覺。如果天氣好，更有機會遠眺 101 大樓添﹗

 

貓空纜車
乘搭捷運木柵綫至動物園站，轉搭貓空纜車

貓空閒
地址：台北市文山區指南路三段38巷34號
電話：0953-304-776 / 0912-359-345
營業時間：
星期日 - 星期四 AM12:00~AM00:00
星期五 - 星期六 AM11:00~AM3:00
Facebook 專頁：貓空閒