【曼谷】夜鬼搵食天堂 - 素坤逸路 Soi 11

為左爭取時間，一般我都會選擇星期五晚放工出發，到步可以食個宵夜之餘，第二日旅程就可以一早開始。去到 Bangkok 已經十一﹑二點咁夜，仲有咩好食﹖如果酒店係喺素坤逸路 Sukhumvit Road 附近 (即 Terminal 21/ BTS Asoke/ NANA 站附近)，你就絕對唔洗擔心會搵唔到宵夜食﹗

基本上我每次落機去酒店 check-in 之後，都會行番去 Sukhumvit Road Soi 11 (Soi 係泰文巷的意思)。Soi 11 愈夜愈熱鬧，夜生活多姿多采，有大大小小嘅酒吧同餐廳﹗最重要嘅係 Soi 11夜晚會變身成食街，有好多車仔檔粉麵﹑大排檔大小炒﹑Van 仔流動酒吧，非常地道而且又平價，好有氣氛﹗

 

次次嚟到 Soi 11，都會去喺左手邊擺檔，位置大約係 Grand President 酒店對面嘅 Jue Jue車仔大排檔係餐勁嘅﹗雖然係 Jue Jue係街邊檔，但都好乾淨﹗

車仔上面一邊左滿海鮮，又另一邊就係炒鑊同各式調味料。

去到泰國，住低梗係要叫番支 Singha Beer 啦

大部份嘅泰菜，好似咖哩﹑冬陰公﹑燒魚﹑串燒… Jue Jue 都有提供﹗而且因為附近好多酒店，好多外國人，所以 Menu 都有英文同相，唔洗擔心言語不通嘅問題。價錢方面，每人平均消費大約 BATH 200 左右，當然 depends on 你叫 D 咩啦﹗

以下係我差唔多次次都會叫嘅野食，全部都鑊氣十足，非常惹味﹗

泰式炒通菜 Thai Stir fried Morning Glory，又香又惹味，食到唔停口

泰式辣椒膏炒蜆，醬汁辣辣地，越食越過癮

炭火燒大蝦，炭火燒烤香加上彈牙蝦肉，鮮味﹗

去泰國我最愛食炒飯，用左香葉同洋蔥爆鑊，夠香夠鑊氣

食完飯，可以買番 D 水果幫助消化﹗ 超級平﹑又甜又好食﹗

想食甜品﹖如果你鐘意食香蕉，可以試試香蕉煎餅有朱古力味同煉乳兩種口味。。檔主先將麵團壓薄，再放落鑊煎後擺上新鮮香蕉，最後就用餅皮包好，切成 12 小塊後再淋上朱古力醬。

 

香蕉煎餅嘅外皮香脆，加上入面地地地又軟綿綿嘅鮮甜，口感特別。雖然上面好似淋左好多朱古力醬咁，但食落口又唔會太甜﹗