【華欣自駕遊】無敵靚景海邊 cafe - Baan Khrai Wang

Ban Khrai Wang 係華欣人氣咖啡店，位於泰國皇室渡假行宮隔離，擁有無敵大海景。Ban Khrai Wang 一D都唔起眼，大門外面感覺好似一般民居，要靠 GPS 帶路先搵到﹗

 

從大門走進 Baan Khrai Wang，會見到一個好大好清幽嘅庭園同埋白色木造建築嘅房子。

 

 穿過小拱門，就會發覺另一小天地。

 

Cafe 分為室內及室外兩部分，室內 area 係白色樓房嘅地下，坐位設計自然簡樸，坐喺室內 area 吹住微微嘅海風歎咖啡，絕對可以滿足到怕曬嘅朋友。

沿路一直再走到盡頭就係擁有無敵海景嘅露天座位。全木嘅坐椅，全海景加上華欣嘅好天氣，感覺實在『泰』relax﹗

Baan Khrai Wang 除左供應咖啡花茶之外，每日更會有 6-7 款新鮮出爐蛋糕，當中椰子蛋糕同雪糕蛋糕更係 Baan Khrai Wang嘅招牌菜。

椰子蛋糕嘅兩層海綿蛋糕好鬆軟，加上椰子忌廉同埋新鮮椰子肉，每一啖都散發住清香椰子味。而雪糕蛋糕就以鬆軟朱古力卷蛋包住雲呢拿雪糕，入口唔會太甜，喺天氣炎熱嘅泰國底下食，特別感覺透心涼。

有靚景，又有咁美味嘅蛋糕，Baan Khrai Wang 收費絕對超值，蛋糕售價平均大約只係 Baht 150 左右。與其去大酒店 high tea，不如去 Baan Khrai Wang 享受一下華欣嘅悠閒時光，感受一下自然嘅海風，欣賞下夕陽美景。難怪連外國人都喜歡去 Baan Khrai Wang 開會~

Baan Khrai Wang

地址：11 Naeb Kechardt Rd., Hua Hin, Prachuapkhitikhan
電話：032-531260-1
營業時間 ：09:00-18:00