【掃食香港】火鍋仔 - 觀塘工廈火鍋私房菜

觀塘番工，所以經常喺觀塘搵食。觀塘工貿大廈林立，工廈樓上 cafe 愈開愈多，估唔到連火鍋都有。唔好以為，工廈食店就一定係平價，喺火鍋仔每人平均消費大約 HKD200-300，但食過之後，你一定會覺得物有所值，只因火鍋仔用料新鮮，而且好多野都係即叫即做，絕不馬虎﹗

火鍋仔非常隱蔽，位於開聯工業中心，位置大概係開源道麥當奴斜對面。上到樓亦都無指示牌，默默隱身喺 D寫字樓旁邊。鋪頭細細，大約只有 6-7 張檯，而且經常爆滿。第一次去嘅時候就因為已經滿座，所以被安排左坐門口嘅位置，實在係別有一番風味﹗

火鍋仔供應十幾款湯底，包括重慶麻辣鍋﹑泰式冬蔭公鍋﹑冬瓜盅﹑蕃茄海鮮蟹鍋﹑澳門豬骨鍋﹑花膠湯雞鍋等，每款湯底都好足料。自己就試過蕃茄海鮮蟹鍋同埋花膠魚骨鍋。

高湯花膠湯雞鍋 (HKD138)，湯底有少少醉雞湯嘅感覺。足料，有差唔多半隻雞同埋好多花膠，清潤滋補

蕃茄海鮮蟹鍋 (HKD168) 係火鍋仔嘅招牌菜之一，湯底入面有蟹﹑蝦同埋大量花甲，清甜好味，忍唔住飲左幾碗湯

火鍋仔對所有火鍋料嘅製作都好認真，海鮮新鮮，最值得欣賞嘅係好多食物都係即叫即做，當中包括手打丸﹑響鈴﹑水餃等﹗

頂級手切牛 (HKD178)，雪花紋理﹑脂肪比例平均，厚薄長短適中，牛肉味濃，軟腍甘香。

美國桶蠔 (HKD88)，蠔肉肥美，鮮甜嫩滑。

花甲 (HKD68)

手打蝦丸拼墨魚丸 (HKD83)，餃同丸類都可以雙併，但食後推介只叫手打蝦丸。唔係因為墨魚丸唔好食，而係從來未食過咁好食嘅即製手打蝦丸，蝦丸勁彈牙又有蝦味，回味無窮

招牌餃拼韮菜餃 (HKD50)，特別推介韮菜餃，皮薄，而且好多韮菜，非常香﹗

即炸響鈴 (HKD42)，新鮮炸出嚟嘅響鈴皮層鬆脆，但一D都唔油，就咁點泰式辣汁食已經夠晒好味。稍稍放落湯到拖一拖，響鈴索左湯汁，都依然保留微脆口感﹗

萵荀 (HKD32)，唔係周圍都食到，索左湯汁後入口爽甜，味道有 D 似油麥菜嘅莖部﹗

火鍋仔

地址：觀塘開源道55號開聯工業中心A座2樓11室
電話：2389 0008