【曼谷】我要做廚神 - Silom Thai Cooking School

Silom Thai Cooking School

如果你同我一樣，超鐘意食泰菜，咁你會唔會又同我一樣，有興趣去學識煮平日我地最鐘意食嘅冬蔭公﹑咖哩﹑Pad Thai…呢﹖

上網 search 左幾間 Bangkok 嘅烹飪學校，大多都係酒店攪嘅。唔單止價錢貴，而且總係覺得酒店教嘅方法或者用料唔夠地道。好彩最後俾我搵到 Silom Thai Cooking School。每位 1000Baht，大約只係 HKD250 就包左五道菜，真係由前菜開始煮到甜品。每日 offer 嘅 Menu 都唔一樣，大家可以先上官網 Menu 睇下有咩特別有興趣嘅 Menu 先安排邊日去。由於每一班只係收 1-9 人，所以好快就 Full，大家要預早 send email 去做 booking 呀﹗

分左三段時間：

• Morning Class : 9:00am - 1:00pm  (INCLUDE MARKET TOUR) 
• Afternoon Class : 1:40pm – 5:30pm  (INCLUDE MARKET TOUR) 
• Everning Class : 6.00 pm - 9.00 pm

而當中朝早同下晝嘅 course 都會包左去 Local Market 買餸嘅環節。平時去夜市﹑JJ Market同鐵道市場就去得多，有無想像過泰國嘅街市又係點嫁呢﹖

確認名額之後 Cooking School 會 send 一封好仔細嘅 email 俾你通知集合地點同解釋等嘅位置。email 最尾仲寫住會有一位叫 Mai 嘅 staff 會喺集合地點等學員，仲寫住 「Mai a short curly hair woman with big glasses.」當日我就上左朝早堂，依時去到 Chong Nonsi BTS Exit 3，當初仲擔心會搵唔到 Mai，不過遠遠就望到一個短攣頭髮﹑帶大大圓眼鏡﹑衣著潮到爆炸嘅女仔企左喺度，我就知一定無搵錯地方。(突登影人地好無禮貌，所以相就無喇﹗不過我相信如果你見到佢，你就會明白﹗)

齊人後，我地就跟住 Mai 行去 Local Market 買餸。 去到 local market，Chef 每人派左一個籐籃。一邊講解，一邊將唔同嘅材料放入我地個籃到。

離開菜市場，兜兜轉轉行過大街小巷，就到左一棟三層高嘅住宅，正是 Silom Thai Cooking School 所在。地下除左鞋之後就可以上一樓最左邊嘅房 (亦係煮完開餐嘅地方) 將個人物品鎖喺儲物櫃﹑洗手﹑著好圍裙，就去另一間房開始上堂喇﹗

入到房，Chef 第一樣交俾我地嘅任務係…洗好晒 D 材料。估唔到我地換圍裙咁短嘅時間，Staff 已經幫我地將材料由滕籃拎晒出嚟，仲要放到咁靚﹗

第一道菜係「冬蔭功」，大家排排坐喺下聽 Chef 講解每一樣材料，話俾我地知有咩係必需嘅，有咩如果買唔到都唔緊要。

 

準備好晒材料，出去露台嘅位置就一字排開，一人一爐，開始煮冬蔭功喇﹗

從來都無諗過原來冬蔭功咁易整﹗唔洗十分鐘已經完成，可以入飯廳歎下個湯喇﹗

 飲完湯又即時去返另一間房準備下一道菜，係我最愛嘅 Pad Thai﹗簡單嘅材料，但係就超級好食﹗

一落鍋已經好香，快炒，唔洗五分鐘，又有得食喇﹗

煮咖哩前，Chef 請我們幫忙先做椰奶嚟準備甜品。初時我仲以為係好似整糕咁，要隔渣，點知 Chef 拎左一個椰子出嚟破開，再將椰子果肉磨出來倒入大盤，再請我地喺椰子絲上加水，然後將水同椰子絲混合，揸 D 椰子汁出嚟做椰子奶! (Chef 話呢個行為嘅功效等到幫對手做左個磨沙 mask，哈哈﹗)

 甜品準備好，就開始做埋最後嘅咖哩。又舂又切準備咖哩料…又到左大顯身手嘅時候﹗

 最後就係食預先做好嘅甜品，好香椰子味，不過可惜我覺得太甜﹗

臨走每位學員會一人拎到一本食譜，很精美, 很有用!!! Design 得好靚，而且非常實用﹗仲有每種材料嘅圖文對照﹗我返香港之後已經跟住佢，成功整左幾次泰餐喇﹗

Silom Cooking School 官網: http://www.bangkokthaicooking.com/