【台北】無敵可愛淡水阿朗基咖啡

淡水老街一向俾人一個非常古舊嘅感覺， 來自大阪嘅阿朗基咖啡就喺上年登陸淡水中正路，裝飾非常可愛﹑為老街增添左一份 Kawaii 嘅感覺﹗

由淡水捷運站出嚟之後向左手邊行大概五分鐘就會見到一棟淺藍綠色嘅建築物，阿朗基咖啡致身嚟灰灰舊舊嘅建築物當中，非常起眼﹗

一樓係吧檯區，側邊有 D 二人坐位的小桌子。感覺有 D 迫，好似係俾人等外賣嘅地方﹗不過相信如果假日人多，一樓都會開放﹗

行到尾，就會見到一大隻河童君，而河童君指住嘅方向，就係去二樓嘅樓梯。

樓梯係黃色嘅牆加上河童君上上落落行到上氣唔接下氣嘅圖案，非常生動﹗

二樓大約有 14 張檯，牆上貼滿左可愛嘅公仔，阿朗基咖啡更加配合節日主題，放置左聖誕裝飾﹗

二樓再上，就係 3F 嘅小閣樓，亦係我預早透過 Facebook inbox message 訂嘅位置﹗小閣樓只係幾張小梳化同兩張檯，私隱度極高，加上昏黃嘅燈光，好有氣氛。

咖啡嘅價錢大約係 NT95-115，除左咖啡亦都有唔少輕食，當然唔少得無敵可愛造型手工蛋糕啦﹗

壞東西雙色濃巧克力蛋糕，朱古力味非常香濃，亦唔會過分甜，但畢竟成舊都係朱古力味蛋糕，食左一當半已經覺得有 D 濟﹗

黃貓重乳酪蛋糕，係香濃嘅 Cheese Cake。

咖啡方面就點了黑兔妹咖啡摩卡同埋河童君的抹茶咖啡。可愛嘅角色杯再加埋同款攪攪棒，非常可愛。

聞就已經有抹茶香氣，淡淡嘅抹茶味加上咖啡味非常好飲﹗

阿朗基咖啡淡水店   
地址：新北市淡水區中正路56號
電話：(02) 2628-1499
營業時間：10:00 - 21:00
Facebook Fan Page：阿朗基咖啡淡水店