【掃食香港】 戀戀沖繩 - 目利之銀次

目利之銀次係沖繩著名居酒屋，單單喺沖繩就有十幾間分店，主打沖繩燒物同埋海產 。你會發現目利之銀次嘅 menu 上面寫住『產地直送仲買人』，意思係有專人喺魚市場直接以最佳嘅價錢選購最佳嘅食材，每日由日本直送到目利之銀次。

目利之銀次喺香港有兩間分店，一間喺屯門V city，一間喺銅鑼灣世貿中心。今次就去左銅鑼灣世貿中心試一試獨特嘅沖繩料理。

目利之銀次嘅裝飾設計亦貫徹沖繩店嘅風格，以木為主題，牆上面掛滿刻有食物種類嘅木牌，大型木酒桶裝飾擺設隨處可見，一走進到目利之銀次，就有一種置身日本當地居酒屋嘅感覺。

 

居酒屋嘅一大特色就係飲品種類繁多，目利之銀次提供左多款飲品選擇，除左無酒精特飲外，沖繩啤酒 Orion﹑清酒燒酌﹑燒酌 cocktail… 一應俱全﹗最特別嘅係香港唔多地方有供應嘅沖繩特產泡盛系列。目利之銀次提供嘅泡盛係由蒸餾而成，再結合果酒造出幾款泡盛 Cocktail，有原味、柚子、荔枝等口味。

冬之特飲，第一次試熱嘅 Fruit Punch，果然有驚喜，清甜帶爽

Orion 櫻花特別版啤酒，100%麥芽製造，帶果香及及比一般 Orion 啤酒重麥味

柚子泡盛，口味清爽，但冰太多，味道好快就變淡

目利之銀次由炭火燒物、拉麵、魚生壽司、甜品等都有提供，收費大約係中等價位。如果唔飲酒，每人平均消費大約 HK150-300 左右，當然要視乎你叫 D 咩啦﹗

當日就叫左幾款目利之銀次嘅招牌菜，的確每一樣嘅口味都好特別，非常美味﹗

肉厚活3年帆立貝 (HKD128)，汁燒厚肉帆立貝切成粒狀，肉質非法鮮甜嫩口

海膽汁燒蠔 (HKD88)，絕對要推薦﹗先將日本廣島蠔炸熟放到鐵板，以菠菜墊底，再喺上面淋上用海膽調製成嘅秘製橙色醬汁。廣島蠔肥美鮮嫩，外皮微脆，味道濃郁，再加上秘製海膽汁，，鮮味又夠口感﹗海膽汁非常美味，最後就連底下嘅菠菜都點晒海膽汁嚟食﹗

鴨肉烏冬 (HKD98)，稻庭冷烏冬配木魚湯，加上鴨胸片同埋溏心蛋。鴨肉味欠奉，反而烏冬成為亮點，烏冬煙韌有彈性，將凍烏冬點上木魚湯同夾埋蔥﹑紫菜﹑銀魚仔同鹹菜一齊食就好好味。

沖繩煎餅 (HKD78)，以香葱煎成薄薄嘅煎餅，再喺上面淋上醬汁及加上紅薑絲同木魚花。煎餅香脆，有 D 煙煙韌韌，唔會有食到一口粉漿好膩嘅感覺。

鹽燒牛舌 (HKD65)，以炭火燒成，牛舌依然保留肉汁，唔會燒得太乾

黑豚係冲繩名物，一定唔可以錯過黑豚涮涮鍋 (HKD138)﹗薄切黑豚背部同豬腩部位，肥瘦分明，油脂分佈平均，放入鮮甜豬骨湯底滾幾秒就食得，肉味濃厚﹗而湯底本身就非常好味，喺湯入面煮過嘅生菜完全吸收晒濃厚湯味，格外鮮甜。如果可以，真係想 encore 多一碟菜嚟食呀﹗

另外，目利之銀次更以特濃豬骨汁代替一般醬油，用嚟點黑豚肉食，更加突顥出肉味。

三五知己，食得非常愉快，忍唔住叫多一瓶清酒。清酒味道有酒香亦帶米甜香味，唔會過於辛辣，香醇易入口。

最後當然唔少得甜品， 蒸紅豆餅 (HKD48)，以小木箱呈上，打開蓋就聞到好香紅豆味。紅豆外型飽滿，米糕煙煙韌韌但唔會好粘牙，亦都唔會過甜，好香好好味。

目利之銀次所提供嘅沖繩料理的確好特別，食材極度新鮮，而且做每一樣食物都好用心。另外，目利之銀次嘅環境舒適，係絕對適合三五知己﹑把酒談歡嘅好地方﹗

目利之銀次  

地址：銅鑼灣告士打道 280 號世貿中心 P502
電話：2895 0885　
Facebook 專頁：目利之銀次