【曼谷】Best Beef - 鐵皮屋炭火燒烤火鍋

平時去 Bangkok 都會搵一晚去下 BTS On Nut 站旁邊嘅 local night market 行下，雖然唔係好大，不過就有幾多野食，仲有 Beer Garden，旅客亦都較小。而且 BTS 站嘅另一邊仲有一間好大嘅 Tesco Lotus，唔洗下下去 Big C 咁多人。

上次上網搵到原來 On Nut 站附近有間叫 Best Beef 嘅 Buffet，港幣六十蚊倒就有任食兩小時炭火燒烤同火鍋食，身為邊爐精嘅我一定要去睇睇啦﹗如果你喜歡地道泰國風味，就一定要去 Best Beef 試下﹗

只要喺 BTS On Nut 站 Tesco Lotus 果邊出口落地下走過 Soi 50，之後沿路直行大約 15 分鐘，就會見到 Best Beef 喺你左手邊。Best Beef 佔地好大，所以一定唔會 miss 左。

Best Beef 俾我嘅第一個感覺，係一間好大嘅鐵皮屋餐廳，入面放左幾十張大大細細嘅坐位﹗雖然無冷氣，但因為入面好大﹑樓底夠高﹑好通風，所以一 D 都唔會覺得好焗好熱﹗當日 7 點去到，Best Beef 入面坐滿左好多剛剛放工嘅泰國人…

Best Beef 嘅收費非常便宜，每位 Baht 219 任食炭火燒烤，仲有牛嘅唔同部位可以選﹗想打埋邊爐﹖只需要加 Baht 50 要多個爐同湯底就得﹗唔好誤會，唔係每位加 Baht 50，係每個湯底加 Baht 50，即係廿蚊都唔洗就可以打埋邊爐﹗

只要劃好點單紙交俾店員就 okay，但點單紙就只有泰文，雖然餐牌上面有英文對照，但唔識泰文都幾難對得好清楚﹗不過既然係任食，咩都試下又何況﹖如果真係唔清楚，Best Beef 有一﹑兩個懂基本英語嘅店員可以問下﹗

坐低店員就會送上幾碟醬料，有泰式辣醬﹑甜酸醬同蒜蓉豉油。

唔好以為幾十蚊一餐 buffet 一家無啖好食，Best Beef 嘅食物一 D 都唔馬虎。唔只有唔同部位嘅牛肉，仲有豬肉同雞肉，就連海鮮都有。而且 Best Beef 對食物處理非常衛生，每碟牛肉都會以牛油紙冚住﹗

鐵板上燒溶牛油避免黐底

Best Beef 嘅牛脷非常美味

打邊爐湯底入面有 D 香料，味道好特別，滾海鮮同菜都好鮮甜

每晚 7 點會有 Live Brand 演唱，飲番杯啤酒﹑聽下歌，好有氣氛

路過嘅小貓，好可愛

Best Beef

地址：  1490/2 Sukhumvit Road, Bangkok, Thailand
營業時間：16:30 - 00:00