【台北】基隆夜市古早味美食

基隆夜市

一般去完十份等地方大概係4﹑5點左右，建議大家搭火車去返瑞芳站，轉乘基隆客運去基隆廟口夜市行下。

停車站就係喺瑞芳火車站出面，行出大街望向右邊就會見到 (頂好 supermarket  對面)。搭基隆客運 787 或者 788，去到基隆火車站行 10-15 分鐘倒就到。

同台北市內嘅夜市唔同，基隆廟口夜市主要以食為主，感覺比較係傳統夜市，有較多台灣夜市嘅舊派野食。

小陳米粉湯

地址：基隆廟口 6 號攤位

非常平價嘅傳統美食﹗賣嘅野食平均 NT20-30，細細碗，唔怕一次過食得太多食唔到其他野。

一直都非常鍾意食台灣嘅米粉湯﹗雖然佢叫米粉湯，但其實並非米粉，感覺有 D 似通心粉狀嘅瀨粉~

經過長時間熬煮而成嘅香濃高湯，加上有 D 煙煙韌韌嘅米粉，上面再放左 D 芹菜同油蔥酥，加上少少胡椒粉，食落口非常香甜。個湯超好飲，而且熱辣辣，冬天食嘅話仲正，次次都成碗連湯食晒。

食米粉湯加上黑白切簡直係絕配。「黑白」唔係指食物嘅顏色，而係隨意通切一通嘅意思，以內臟為主，可以隨意選擇豬大腸、豬心、豬肝、豬肺、豬皮等，放響高湯入面汆燙，熟透之後撈起，再加上蒜蓉醬油同埋嫩薑絲，非常鮮味。

 

最後推薦白蘿蔔，配醬油膏同甜辣醬提升鮮味，超甜﹗

好吃鹽水雞

去夜市點少得鹽水雞呀﹗
沿路一直行到馬路口，見到有好多人排緊檔車仔檔，原來係好吃鹽水雞﹗同檔口名一樣，真係好好吃。

雞胸﹑雞腿﹑雞腸﹑雞珍﹑雞心﹑青花椰﹑筍﹑青豆﹑青瓜… 咩都有﹗建議一定要夾 D 瓜同菜，因為加埋落 D 醬料到，辣辣地，瓜菜特別鮮甜。
 
夾好想要嘅料，店家就會將佢地切好，問你要唔要辣，之後會加入 D 特製嘅醬料，再灑上大量胡椒粉﹑薑絲﹑蔥花同芫茜 (有咩唔食記得同佢講唔好落呀﹗)。

夾一大袋都係 NT200 倒，超抵食。 

新竹米粉湯　

地址：基隆夜市廟口前 27 號攤位

食完一大輪，兜番出嚟嘅時候，又忍唔住想食多碗米粉湯。
因為每檔熬湯嘅材料同方法唔同，所以煮出嚟嘅味道都唔一樣，所以即使係同一樣野，去到每間檔口都會有唔同嘅新鮮感。

今次試試真正嘅米粉，米粉完全吸收晒湯汁，超級好味。另外，仲叫埋豬紅同魯肉飯，實在非常豐滿足。

 

基隆夜市當然唔止咁少野食啦﹗仲有無數台灣傳統小食，好似大腸包小腸﹑刨冰﹑地瓜球等，一定食到捧住個肚走﹗要返台北市，只要行番去基隆火車站搭台鐵就得﹗