講起漁市場，第一時間一定會諗起日本嘅築地市場，估唔到只需要一個鐘頭飛機就去到嘅台北，都會有一個上引水產。
上引水產官網上面寫乘捷運到行天宮站或者中山國中站就到，但實際上捷運站距離上引水產都幾遠下，建議大家出左捷運站之後轉的士，車費大約 NT100 左右。
 |
| 上引水產 |
上引水產分左 10 個區，當中包括「活體水產」﹑「生鮮超市」﹑「即時熱食」﹑「立吞壽司」﹑「備長碳海鮮燒烤」同埋「樂烹鍋物」。
一入到去，首先會見到有 41 個水槽嘅活體水產區，專賣生猛海鮮，日本毛蟹﹑鮑魚﹑龍蝦﹑鱈場蟹…應有盡有，而且價錢都幾合理。
最重要嘅係上引水產一律只收現金，記得帶夠 cash﹗
唔單止咁，場內仲設有活體處理區，幫你處理好海鮮，連代客烹煮都做得到。見到師傅劏龍蝦，差 D 忍唔住買番隻嚟食﹗
經過活體水產區就係超市，有大量魚生、新鮮蔬果、食材、乾貨賣，側邊仲有個熟食區，可以買到炸烤熟食同日本料理。其實除左立吞壽司同戶外燒烤，喺超市買齊野食，大門外嘅檯仔開餐都係一個唔錯嘅選擇。
超市中央就係立吞壽司所在。立吞壽司同埋戶外燒烤都係朝早十點開始營業，而且一開門就人山人海，到左十一點倒，嚟食 lunch 嘅人更加係源源不絕，所以建議朝早 9:45am 去到，或者第一時間衝去拎左張號碼飛先再慢慢行。
門口有塊木塊 Menu 同埋是日限定料理，如果等緊位，千祈唔好睇，因為越睇越肚餓，感覺好似等好耐都未到你咁﹗
我絕對有理由相信呢間喺立吞區附近嘅小酒吧，係為左等位等到唔耐煩嘅人而設嘅，價錢仲要好平添，不妨飲番杯﹗
當日十點鐘去到都等左 25 分鐘， 行完又行，不停望入去見到一盤盤嘅壽司，真係好想即刻衝入去呀﹗
立吞區係企喺度食嘅，應該唔洗多解釋了吧。店員安排好位置就會幫忙點餐，一路望住面前嘅師傅手握，感覺真係有 D 以為自己去左日本。
「上引水產」由日本壽司冠軍武田正彥坐鎮，手握壽司又點可以唔試。 當日就點左手握壽司套餐，跟餐仲會有一碗味噌湯。呢碗魚骨味噌湯真係無得頂呀﹗好足料﹑好濃郁鮮甜嘅魚香味，仲放左蝦頭增加鮮甜，天氣咁凍飲一碗熱辣辣味噌湯暖暖胃，真係超感動﹗
魚生新鮮鮮甜就唔需要多講，我覺得手握壽司舊飯更為重要。做手握壽司握飯嘅力度同埋次數都會影響到出黎嘅效果，立吞區嘅手握壽司就洽到好處，唔會鬆亦不過實。另外，仲加點左單點嘅握壽司，和炙牛肉同海膽都係十級推薦。牛肉好香﹑海膽微甜而且一 D 腥味同怪味都無，對上一次食到咁鮮甜嘅海膽已經係幾年前去北海道嘅事。
埋單 NT1,000 有找﹗抵到爛呀﹗真係等耐 D 都值得。
喺立吞壽司出去就係備長碳戶外海鮮燒烤區，本來仲諗住食完壽司就去試下，點知已經飽得太滿足，留番下次吧﹗
上引水產
地址：台北市民族東路410巷2弄18號
電話：(02) 2508-1268
營業時間：6:00-21:00
Posts
No comments:
Post a Comment