【掃食香港】來自香港的乳鴿配啤酒 - 德記大排檔

香港大排檔嘅食物非常地道，而且夠晒「鑊氣」，但可惜愈來愈少，沙田沙角邨對開熟食中心僅存左幾檔買少見少嘅大排檔。德記大排檔乳鴿皮脆肉嫰，非常香口﹗如果炸雞配啤酒因為來自星星變成大熱，我認為來自香港的乳鴿配啤酒係更完美嘅組合﹗

上星期六同班朋友就突登揸車去左沙角邨食德記大排檔。當日大概 7 點去到，由於係星期六晚，人已經開始多，好彩有張空檯唔洗等，如果再夜 DD 就可能要等好耐喇﹗

廚房就喺旁邊，非常地道，好有大排檔風味

德記大排檔嘅價錢非常經濟實惠。乳鴿 50 蚊大大隻，而一般嘅小炒都係 HKD50-60﹗唔好講咁多，4 個人，一人整番一隻乳鴿先﹗

順帶一提，德記大排檔乳鴿可斬件或成隻上，落單嘅時候記得講清楚。我就覺得成隻上好食 D，因為乳鴿要用手攞住食，熱辣辣大啖大啖咬先過癮。

德記大排檔乳鴿夠晒大隻，炸得好香，一上檯已經聞到陣陣香味。咬落去，乳鴿外皮超級香脆，唔算好油。乳鴿本身好厚肉，肉好嫩，而且好多肉汁，唔會炸到「乾曾曾」﹗因為乳鴿本身已經夠味，所以唔洗再點野﹗

 

大家極快速就消滅左隻乳鴿，再加點左一 D 小炒。

招牌雞粥，粥底好綿，每啖都有雞嘅味道，夠晒香

清炒油麥菜，菜本身好甜，炒得夠晒「鑊氣」

鵝腸一般，唔夠爽口

德記大排檔

地址：沙田沙角邨熟食中心5號 (沙田圍站對面)
電話：2647 1720