【台北】曾德自助火鍋城 - 西門町平價石頭火鍋老店

曾德自助火鍋城

好多人去到台灣都會食麻辣火鍋或者吃到飽 (任食火鍋)。
台灣嘅吃到飽的確好抵食，每人百幾蚊港紙埋單已經包晒野飲同醬料錢，仲會有各式各樣嘅海鮮。不過如果想打得又平又有特色一 D，我就推薦曾德自助火鍋城﹗

曾德自助火鍋城喺西門國小對面，由西門町只要沿成都路國賓戲院果個方向一直行，只需要大概 10-15 分鐘就到。離遠已經可以見到曾德自助火鍋城嘅招牌。

當日大約 7 點幾去到已經滿座要等位，好彩等嘅人未算好多，等左 15 分鐘倒就可以安排入座。曾德自助火鍋城嘅外表睇起嚟好舊，唔係好吸引咁，係區內嘅老字號火鍋。

牆上面有一大塊價錢表，最貴嘅肉類或者海鮮都只係 NT60 一碟，我相信呢度要吃到嘔可能比起吃到飽火鍋店仲要平。話明自助火鍋城，梗係要自己去冰櫃拎啦﹗所有野食都層層疊疊一碟一碟放喺冰櫃，除左肉類要另點之外，其他野都係自己拎。好似食迴轉壽司咁，最後埋單果時就會有人埋嚟幫你數碟計數。

 

 

雖然無好特別嘅火鍋料 (最貴都係 NT60 一碟，相信你都唔會 expect 有帶子生蝦)，但選擇都算幾多，貢丸、花枝丸、金針菇蛋餃、豬紅、香菇、腐皮、芋頭、菜、豆腐、公仔麵等，大部份打邊爐嘅料都有。醬料可以話應有盡有，而且更加有秘製沙茶醬。不過我認為唔需要落太多醬料，因為本身個湯已經好夠味。

 

一放低袋就二話不說來來回回走去拎野食同醬料，原來那邊廂已經準備好上演一場 live show。

 

同平時打邊爐唔一樣，店員先拎嚟一個厚底大黑石頭鍋開火加熱，然後落麻油、洋蔥、蘿蔔絲、九層塔同一碗極神秘醬料爆香，之後再落肉同其他火鍋料炒至半熟再加高湯。

 

 

成個過程非常 impressive，而且當店員一落佐料落鍋爆香嘅時候，已經香氣四溢，未落湯都想即刻夾一舊嚟食﹗食咁香濃嘅石頭火鍋再加多枝台灣啤酒，係最佳享受。當日不停食完又拎，食完又拎，食左十幾廿碟，再加上飲品，平均每人都係 NT350 倒，真係抵到爛﹗

曾德自助火鍋城 

地址：台北市萬華區成都路 153 號 

電話：(02) 2311-6585

營業時間：11:00 - 01:30