【掃食香港】地道泰式街邊粉 - 西貢滿泰小食

鍾情於泰國，熱愛度高到試過一年內去左 4 次泰國旅行，而喺泰國我最鐘意食嘅就係周圍都有，路邊車仔檔嘅鴨肉粉，自從食左一次之後， 一食就食上癮﹗有時喺香港一起身就想整番碗，試過好多唔同嘅餐廳，但根本一 D 泰國食到嘅味道都無，好不容易先試到兩間味道似，好食又經濟嘅，一間係九龍城同心泰國菜館，而另一間就係西貢滿泰小食﹗

 滿泰小食喺西貢小巴總站果邊，7-11 側邊條巷仔行入去。

 

滿泰小食有兩三個鋪位，每間舖面唔係好大，地方都好乾淨企理。

兩個人一坐低，咩都唔諗，即刻叫番碗泰式鴨肉湯粉﹑泰式雞鴨肉湯粉同埋凍咖啡。滿泰小食嘅湯粉價錢大約係 HKD30-45 一碗，西貢區嚟講真係相當經濟實惠。

食泰式湯粉不可缺少嘅調味料

湯粉係用幼金邊粉，金邊粉好滑，而且唔會太淋，有 D 煙韌。帶點濃味嘅湯頭，再加上蔥花、芫茜同冬菜，非常夠味。肉方面雖然唔係嫩嫩嘅鴨肉，但咬落去就有濃郁鴨味。碗粉所有材料整體配合得好好，煮法亦有泰式街邊粉嘅味道。一試愛上，無得去泰國住，唯有專登揸車到西貢滿泰小食止止渴﹗

泰式鴨肉湯粉

泰式雞鴨肉湯粉

滿泰小食店

地址：西貢福民路高勝樓地下25號舖
電話：2791 2271
營業時間：09:00 - 22:00