【不漏洞拉之旅】美奈 - 人間世外桃源

越南係發展中國家，公路並未發展完善，往來唔同嘅地方都要花上很長嘅時間。由胡志明市坐大巴去位於越南中南部嘅小鎮就需時 6 個鐘，不過去到擁有呢個人間仙境嘅地方，放慢腳步，壓力全消，即使搭長途車都值得。

想要介紹嘅係位於越南南部嘅小鎮 - Mui Ne，中文名有人稱佢為『泥角』，亦有人叫佢做『 美奈』，以前只係一個製作魚露嘅小漁村，慢慢被發展成一個旅遊點，但係就並未 well-developed，所以依然保存住好多極美嘅自然風光同小鎮情懷，喺美奈嘅時候，你可以同久違了嘅大自然來一個親密接觸。

美奈大部分酒店都集中喺狹長嘅海岸邊，每間都有獨特嘅風格。但去美奈，最重要嘅係要租架 JEEP 去幾個人間世外桃源 (大多酒店 reception 都有 Jeep 司機嘅 contact，直接問酒店就可以安排到)。

包車一般會包 4 小時，價錢由 USD25-40 不等，至於出發時間，我建議清晨天蒙光出發，咁就可以趕得到去睇日出美景﹗至於 4 小時嘅行程就包括左仙女溪 (Fairy Stream)﹑白沙丘 (White Sand Dune) ﹑紅沙丘同漁港，每一個景點都會令你眼界大開。

天未光晒就出發，Jeep 喺海邊公路飛馳，沿路不停都會見到放牛嘅人﹗