【掃食香港】牧羊少年咖啡．茶．酒館 - 只談旅遊事

一直都有聽唔同嘅人 mention 牧羊少年咖啡．茶．酒館，但可惜因為牧羊少年經常都要等好耐，所以一直都無鼓起勇氣去排隊，上星期放工就終於決定去試試﹗

牧羊少年咖啡．茶．酒館位於一條有唔少車房嘅小街，如果唔係刻意要去嘅話，應該都唔會有咩機會行過附近。牧羊少年咖啡．茶．酒館門口已經清楚寫住『在這裡，我們談的便是旅遊的事』，店主想要提供一個 area 俾人去計劃旅行，放慢腳步去找尋自己嘅烏托邦。

果日雖然落住毛毛雨，但 7:30倒去到，已經企左大約十幾人喺門口等位，等左大約半個鐘倒，終於可以安排入座，入座嘅時候，店員已經同我地講如果有人等位，用餐時間係兩個鐘。雖然明白到鋪頭生意太好，人客太多，但作為一間以慢活優閒為主題嘅 cafe，限制用餐時間好似有 D 大煞風景。

 

牧羊少年咖啡．茶．酒館桌椅以原木為主，感覺好自然樸實。店入面亦放左好多旅行相關嘅decoration，牆上掛左好多國旗，喺牧羊少年咖啡．茶．酒館的確俾你有一種滔滔不絕旅遊話題嘅感覺﹗

店入面有一個大書架，放左唔同國家嘅旅遊書，客人可以 feel free 拎埋位睇。如果你搵到岩用嘅書，想將佢拎番屋低慢慢睇，你更加可以將 HKD20 放入書架上嘅籌款箱，而捐款會作慈善用途﹗除此之外，牧羊少年咖啡．茶．酒館亦有舉辦『以書易啡』活動，如果你屋企有 D 唔再睇嘅旅遊書捐贈俾牧羊少年，就可以獲贈一杯 $25 或以下嘅咖啡﹗環保之餘，又可以幫到有需要嘅人，idea 的確好好﹗

    

牧羊少年咖啡．茶．酒館亦提供左好多自製遊記，記錄左好多真實旅遊故事

牧羊少年咖啡．茶．酒館亦提供左一塊水松板，俾客人公開徵求旅伴，大家都各自寫低姓名、聯絡方法同目的地等，希望搵到個志同道合嘅人去實踐旅遊計劃！

 牧羊少年咖啡．茶．酒館食物嘅價錢唔算好貴，一個 set dinner 大約 HKD70-80﹗食物質素都算 okay，唔可以稱得上好好食，但總算不過不失﹗

 

 

特色飲品，藍 & 綠，味道尚可

花茶飲落口有菊花香味，但回甜嘅味道有 D 過甜

大拼盆，份量都幾多，夠 4 個人以上食

鰻魚炒飯，不太油，不過有 D 過鹹

牛柳粒燒汁長通粉，牛肉都幾好食，長通粉唔會太淋

松子仁欖油鮮蝦天使麵，蝦好新鮮爽口

牛扒都幾多肉汁，最好味係薯條，炸得好好食

當日一行 4 人，亦因為太多人嘅關係，所以要『搭檯』﹗坐低先發現，檯有 D 細張，而座位亦都好迫，欠缺舒適放鬆感。亦剛巧側邊『搭檯』嘅食客講野聲浪很大，所以最初進店內嘅感覺‥‥真係不太好﹗對於一直以為牧羊少年咖啡．茶．酒館係休閒﹑慢活 ﹑enjoy life & travel 嘅我，真係有 D 失望﹗

以旅行為 cafe 主題嘅概念確實係好好，而香港的確缺少左可以俾旅行愛好者聚集﹑搜集資料同交流嘅好地方，絕對值得支持。不過長遠落去，相信牧羊少年咖啡．茶．酒館應該要好好想想… 點樣可以 balance 收入同埋客人喺餐廳內嘅感覺，如果唔係… 一個咁好嘅 idea 就只會變成為一間有幾間分店嘅餐廳。

牧羊少年咖啡．茶．酒館

地址：太子白楊街 27-29 號嘉安大廈地下 1 號舖
電話：2779 0559
營業時間：
星期一至四 12:00-02:00
星期五 12:00-03:00
星期六 11:00-03:00
星期日及公眾假期 11:00-02:00
Facebook 專頁：牧羊少年咖啡．茶．酒館