【日本】探訪風靡全日兩代和歌山貓站長

和歌山電鉄貴志站嘅貓站長風靡全日，梗係要去拜訪一下啦﹗小玉  (たま‧Tama) 本來只係一隻居無定所嘅流浪貓，自從被清潔人員發現，再寄養到車站旁的邊嘅店舖之後，就堅守「站長」角色，2007 和歌山電鉄仲特別任命小玉為獨一無二嘅貴志站站長添﹗
租車自駕遊，所以決定由大阪出發到伊太祈曽車站泊低架車，再搭和歌山電鉄到貴志站。因為伊太祈曽車站附近有駐車場，而且只需 ¥200 就可以泊足全日，泊好車，去到伊太祈曽車站入面就會見到有個箱仔入錢。

去之前無諗過原來伊太祈曽車站都咁有特色，小小嘅古舊車站，別有一番風味。

 

 由伊太祈曽車站到貴志站車程大約 15 分鐘，車費係 ¥290。假如你唔係自駕，又或者想去埋和歌山玩都可以乘坐和歌山電鉄。

站內發現當日當席貓站長嘅名單，原來伊太祈曽車站都有位二代貓站長。大家安排行程嘅時候記得要double check 下 たま駅長とニタマ駅長の勤務予定，睇下貓站長會唔會放假。

伊太祈曽車站嘅貓站長係小玉二代，比較年輕，非常精靈，將會係小玉接班人，有時周末假期仲會去貴志站幫小玉代班添﹗

 伊太祈曽車站小小的月台，充滿住歷史嘅行蹟，係最典型嘅日本鐵路車站設計。

本來因使用率不高而面臨廢線，但因推出三款主題列車同埋紅爆日本嘅貓站長開創話題，吸引左不少遊客，更因此而成為景點之一。

貴志線有三款主題列車，包括「草莓列車」(いちご電車)﹑「玩具列車」(おもちゃ電車) 同埋「小玉列車」(たま電車)，配合主題嘅彩繪列車車身，加上車廂內佈置，令每一列列車都呈現出不同風格。出發前可以先到和歌山電鐵網站查看列車時刻表，預番來回程時間。本來最想搭「小玉列車」，點知「小玉列車」當日停駛，最後就坐左「草莓列車同「玩具列車」。

和歌山係水果王國，每年 1-5 月都有好多草莓園開放，而「草莓列車」就用左呢個和歌山名產而設計，車廂內外都佈滿左草莓圖案。

「玩具列車」將車廂打造成 BB 房一樣，以木色為主調，展示左好多懷舊玩具，列車內仲有扭蛋機，連 BB 床都有添﹗

一上車就不停影相，話咁快就到左貴志站，可以見下風靡全日嘅貓站長﹗貓站長紅透日本，貴志站喺 2010 年仲重新裝修，變身貓臉車站，屋頂上仲寫住貓站長個大名，非常可愛﹗

小玉站長已經十幾歲高齡，所以很多時都會處於昏睡狀態﹗

車站內有飼養小玉嘅小山商店，有好多小玉周邊商品﹗門口仲有車長製服，可以著上於車站門口影相留念添﹗

而另一邊就係TAMA cafe 同博物館，等車嘅時候不妨入去飲番杯咖啡。

貴志行大概需要一個早上嘅時間，建議一早出發，下晝就可以去其他景點﹗