【日本】名古屋駅附近地道抵食居酒屋 - どて家

名古屋到著，機場出去位於名古屋駅附近嘅第一富士ホテル check-in 後，即刻出去附近搵食﹗手羽先係名古屋名物，第一時間就想試下，起行前 search 過好多人都推薦世界の山ちゃん，但世界の山ちゃん已經喺尖沙咀金馬倫道開店，去到名古屋點可以食番 D 香港有嘅餐廳呀﹖喺酒店附近幾條街兜下，最後發現左一間位於二樓嘅居酒屋 どて家，就決定入去試下﹗

大約 9 點幾去到 どて家，入面坐無虛席，而且店內全部食客都係日本人，非常 local﹗不過走到唔係旅客常到嘅餐廳食野，第一個遇到嘅問題就係言語不通﹗店內職員只懂得非常簡單嘅英文，而 menu 亦係全日文，只有少量漢字﹗雖然係咁，但我仍然比較喜歡走進當地人嘅生活，去 local 嘅食店用餐，經常都會有比去旅客熱捧嘅食店更意想不到嘅驚喜﹗

 

どて家嘅職員相當友善，雖然言語不通，但都非常耐心解釋，憑著 menu 上少量漢字加上 body language，終於順利成功下單﹗

喺 menu 上見到"大根"，以為會係汁煮大根之類，上桌先發現原來係大根沙律，非常有趣﹗生嘅大根真係第一次食，日本大根好鮮甜，加上酸酸地嘅醬汁，非常醒胃﹗

冷奴，日式冷豆腐配上醬汁蔥花，豆腐好滑，又唔會太軟身，一夾就散，，入口豆香味四溢﹗

牛すじのどて煮込み係どて家推薦美食之一，雖然叫嘅時候唔知係咩，但都要點嚟試下﹗可以形容為日本醬汁油煮牛雜，味道濃郁。完全吸收晒醬汁味嘅牛根同大根特別好食，入口溶化。

名古屋名物手羽先，どて家嘅手羽先可以話係今次名古屋之行食過最好食嘅﹗手羽先外皮酥脆，內裡肉質軟嫩而且非常入味，手羽先非常乾身，又一 D 都不油膩，夠晒惹味，佐酒一流！

清酒煮蜆 ，蜆肉飽滿鮮甜，湯同蜆都帶有陣陣清酒香，滋味無窮。

去居酒屋串物點可以少，叫左各式各樣嘅串物，大部分都唔洗 100 Yen，抵食之餘，不論係鹽燒定汁燒都好好食。

埋單先令人驚訝，叫左十幾樣野食，再加上啤酒﹑清酒﹑日本果酒等種種飲品，埋單都唔洗 6000 Yen，500 蚊港幣都唔洗。どて家夠晒 local，坐得舒服，食物又好食，而且仲咁抵食，大滿足﹗

どて家 駅西店

地址：愛知県名古屋市中村区則武2-3-2 サン・ナゴヤ則武ビル 2F
電話：052-414-6155
営業時間：16:00 - 24:00