【日本】大阪即食麵發明紀念館 - 親身造一個你的專屬杯麵

無論你鐘唔鐘意食杯麵，去到合味道發明記念館都必定會為杯麵而瘋狂。喺即食麵發明紀念館唔止可以了解到杯麵構同製造上嘅種種細節，更加可以親身造一個獨一無二嘅專屬杯麵，非常有紀念價值，大人﹑細路都一樣玩得好開心﹗

由大阪心齋橋揸車到即食麵發明紀念館大約只需半個鐘，館外亦有免費停車場。如果搭車去的話，可以到梅田駅搭乘阪急電車寶塚線至「池田駅」，急行列車大約需時 20分鐘。到左池田駅之後喺 2 號満寿美町出口再行 5-10 分鐘就會見到合味道創辦人 - 安藤百福像。

即食麵發明紀念館係免費入場嘅，入面可以睇到創舉人安藤百福點樣一步一步發明出今時今日全世界都會食嘅杯麵﹗安藤百福喺 1958 年就首創左即食麵，到 1971 年就發明左世界上第一個合味道杯麵喇﹗

點解杯麵個麵餅都要壓縮到咁﹖點解最底會有一個空間﹖留番俾你去即食麵發明紀念館搵答案啦﹗

 行經呢一度，感覺就好似經過一條杯麵時光隧道一樣﹗

參觀到最後，就係即食麵發明紀念館嘅重頭戲 - 『My Cup Noodles Factory』喇﹗喺呢度可以發揮創意，由杯身設計到湯底同配料嘅選擇都由你話事，非常好玩﹗

 『My Cup Noodles Factory』係唔洗預約嘅，不過人多嘅時候可能會需要排隊等候耐 D。另外，杯麵賣完亦有可能提前結束，所以盡量安排早 D 去穩陣 D﹗

首先係喺自動販賣機買一個吉杯，每個只需 ￥300。

之後職員會簡單講解一下注意事項同埋蓋上杯蓋，就會安排進入 DIY 區域嘅座位。呢個時候﹒﹒﹒最重要梗係發揮創意啦﹗

畫好之後就可以去入麵同挑選材料喇﹗

可以自己親手將麵餅入杯，小朋友最開心﹗

之後就到選湯粉同配料嘅時間，每杯可自選四款配料+ 一款湯粉。雖然都無打算打開嚟食，但可愛嘅小雞可以話係必選。

最後經過封蓋﹑密封縮膜，一個獨一無二嘅杯麵就完成喇﹗

玩完就走﹖不如坐低食番碗麵啦﹗即食麵發明紀念館內設有幾部杯麵自動販賣機，出售各縣限定杯麵﹑全新未上市杯麵以及 JAL 限定版杯麵，坐低食完仲可以買多幾袋限定版杯麵走添﹗

 

到訪當日，辛味噌杯麵咁岩同日推出，梗係要第一時間試下啦﹗

即食麵發明紀念館

地址：〒563-0041大阪府池田市満寿美(ますみ)町 8-25
電話：072-752-3484
開館時間：9:30am - 4:00pm (最終入館時間為 3:30pm)
休館：逢星期二
官方網頁：http://www.instantramen-museum.jp/