【掃食香港】街市主題火鍋﹒即劏即食買餸打邊爐 - 鮮入圍煮

今時今日嘅香港，新式街市同大型超市入侵，唔好話喺街市打邊爐，連行懷舊街市嘅機會都非常少﹗ 位於旺角嘅鮮入圍煮開業應該已經有大半年，可以話係非常受歡迎嘅話題火鍋店，原因係因為鮮入圍煮嘅獨家創意懷舊街市主題火鍋﹗

鮮入圍煮店內裝潢簡直就係將懷舊街市植入，圓檯摺櫈，角落放滿一盤盤枝裝可樂，更設有豬肉檔、魚檔、菜檔等。食客需要走到檔中前挑選火鍋料，而檔主亦會熱情推介同埋介紹是日靚菜同抵食海鮮，點好食物，店員更會即刻喺檔口切手切肥牛或者劏海鮮﹑田雞，非常有 feel﹗

夠晒好玩又有 feel，食物質素同價錢又如何﹖海鮮即劏夠晒新鮮，大大隻新鮮鮑魚都只係廿蚊隻﹑手切肥牛肉味香濃，一大盤都只係賣 $128，非常抵食，叫到一檯都係，又牛又海鮮又啤酒都係二百蚊有找，絕對超值﹗

總括而言，鮮入圍煮位於旺角鬧市，非常方便。即劏海鮮新鮮程度亦唔需要多解釋，抵食之餘，服務亦都好好，岩晒一班朋友去打邊爐﹑吹水同飲啤酒﹗

鮮入圍煮

地址：旺角登打士街43H號登打士廣場2樓
電話：2782 2003
Facebook 專頁：鮮入圍煮