【日本】¥280 全品均一價居酒屋 - 名古屋鳥貴族

有一晚返到名古屋，去Hotel MyStays 名古屋榮 check-in 完已經十一點幾，但去到日本，唔去居酒屋食宵夜好似訓唔著咁，就即刻落樓搵食﹗酒店附近有世界の山ちゃん，但世界の山ちゃん已經喺尖沙咀金馬倫道開店，去到日本無理由食間香港有嫁，所以就喺酒店附近亂咁兜下﹗一路行經過好幾間居酒屋都係十二點倒就閂門，最後由廣小路通走左入一條橫街，見到鳥貴族全品均一價只係 ¥280，而且仲開到凌晨 4﹑5 點，就決定一試﹗

 

原來鳥貴族喺日本當地非常受歡迎，係一間平價連鎖串燒居酒屋，日本好多地方都有分店，好多日本人都鍾意三五知己去食下野﹗雖然係走平價路線，但鳥貴族裝修一 D 都唔馬虎，一格格包廂以木板分隔， 座位隱密度高，每一張檯都會有自成一角嘅感覺，岩晒摸住酒杯底傾下計。

¥280 全品均一價絕無取巧，鳥貴族 menu 上所有食品同飲品都只係賣 ¥280。鳥貴族除左供應串燒之外，更有炸雞、飯糰、麵類可以選擇！另外，所有飲品，包括酒精飲品都只係 ¥280，廿蚊倒就可以飲到啤酒﹑梅酒﹑水果酒﹑cocktail等等，抵到爛﹗雖然店員只懂日文，但鳥貴族 menu 圖文並茂，唔需要擔心言語不通嘅問題。

鳥貴族供應多款串燒，大部份都可以挑選口味，有醬燒 (たれ)、鹽燒 (塩)、辣烤 (スパイス) 三種。串燒肉嫩多汁，佐酒一流﹗

糖心蛋同冷奴豆腐，可以話係日式居酒屋必點﹗冷奴豆腐非常嫩滑，富有豆香味，加上蔥花麻醬，令人想食完一舊又一舊﹗

完全無諗過 ¥280 可以食到釜飯，上桌由生米煮成熟飯，製作認真。白米同上湯吸盡嫩雞肉﹑松茸同牛蒡嘅精華，米飯食落特別甜。另外底部飯焦亦十分惹味﹗

鳥貴族全品均一價 ¥280，實在令人可以放肆地大叫特叫，大飲特飲，特別適合一班朋友去傾下計，討論下行程﹗

鳥貴族 (栄4丁目店)

地址：日本愛知県名古屋市中区栄 4-4-1
電話：052-243-2400
官方網頁：http://www.torikizoku.co.jp/