【台北】一個人在淡水穩閉 cafe 發呆 - Ancre Cafe

每次去台北都係住喺最熱鬧地段嘅酒店，今次因為工作需要到台北，被安排淡水嘅酒店，淡水嘅寧靜令人有一種想放慢腳步嘅感覺。有一日起身，藉著 meeting 係下晝先開始，就突登走過淡水老街行下。 

一個人，漫無目的咁沿著淡水河岸一直行，不知不覺行左去中正路，遠望發現一間喺 2 樓，面對住淡水河嘅 cafe，就即刻想上去坐下。

急不及待，再向前行多幾步，就發現左 cafe 嘅正門喺果幾棟小樓房嘅前面。

 走到最前面，就發現寫著 Ancre Cafe 嘅招牌，Cafe 位於小樓房嘅 2 樓。

 

  門口上面貼左張告示，完全符合晒我果一刻嘅要求。

 呢條樓梯就好似從繁華亂世通往寧靜嘅大門一樣。

Ancre Cafe 由兩姐妹一齊開嘅，佢地嘅夢想係開一間小 cafe，睇嚟佢地嘅夢想已經超額完成。

Ancre Cafe 分左兩個 area，樓梯嘅左邊係 Cafe 水吧同室內高腳椅靠窗區。

 

而右邊就係包廂同室外向海嘅座位。包廂座位嘅復古傢俱加上木門窗，為 cafe 增添左另一番風味。

 喺包廂木門行出去，就係室外向海嘅座位。

 室外只設有三張靠海嘅二人檯，同埋兩張 4-5 人檯。簡樸嘅 Sofa 同籐椅令人感覺好輕鬆。

 

 

Ancre Cafe 嘅手作 MENU 非常有心思，全部都係由店主兩姐妹一手包辦。

Ancre Cafe 提供左唔同嘅咖啡﹑花茶等飲料選擇，亦都有 tea set 同幾款輕食。

當日就點左一杯冰咖啡同 cheese cake，都相當有水準，特別係件 cake，cheese 味香濃，但成晒成件都唔會場覺得膩。

一個人坐喺靠海嘅二人檯，望住海景，歎住咖啡，聽住輕快嘅音樂，吹住柔柔嘅海風，不知不覺就進入左放空嘅境界，成個人感覺好 relax，走嘅時候就好似充滿電一樣。開會之前竟然搵到一間咁有 heart 嘅穩閉向海 cafe，是多麼美好的一件事。

Ancre Cafe

地址：新北市淡水區中正路 233-3 號 2 樓
電話：02-26260336
營業時間：
星期一 - 星期五：11:00 - 22:00
星期六 - 星期天：8:00 - 22:00 (有提供早餐)
Facebook 專頁：https://www.facebook.com/ancrecafe