【沙巴】超地道閒逛 - 加雅街周日市集及魚市場

去旅行最愛行市集，我覺得每個國家嘅市集或市場都係當地人嘅生活縮影，喺市集入面總可以搵到地道土產﹑食材，可以睇到當地人喺市集內討價還價，感受到當地嘅風土民情，係一個非常有生活感嘅體驗！

去到沙巴，又點可以錯過周日限定嘅加雅街市集同埋當地嘅魚市場 ﹗

加雅街係沙巴亞庇市內一條主要嘅街道，但一到左星期日朝早，就會變得人山人海，擺滿一個個嘅小販檔﹗雖然加雅街周日市集係旅遊點之一，但賣嘅野依然相當地道，貨品種類可以話係包羅萬象，水果蔬菜、盆栽、草藥、寵物、衣物、書籍、古玩、手工藝品、五金物品﹑紀念品、以地道小食、咖啡等，咩都有﹗喺加雅街周日市集尋寶，隨時可以搵到特色物品﹗

  加雅街周日市集內有好多檔賣花卉盆栽嘅檔攤，連榴槤﹑山竹樹都有得賣﹗

市集內亦有賣即磨沙巴咖啡嘅檔攤，經過聞到即磨嘅咖啡豆香味真係吸引﹗

當然唔少得遊客買嘅紀念品啦﹗

總括而言，加雅街周日市集售賣嘅物品大多都係 target 本地人，無變左一個只做遊客生意，專賣紀念品嘅市集﹗市集過左中午12時就會陸續收檔，所以想要逛市集，先決條件就係要早起。

Gaya Street Weekend Market

營業時間：星期日早上6:30 - 下午1:00
地址： 加雅街 (Gaya Street)

行完市集，向 WaterFront 方向行，喺 Central Market 側邊，有一個魚市場，正是沙巴各大食肆嘅入貨地點﹗市場內海鮮嘅種類﹑size 同價錢都實在令人驚訝﹗

魚市場位於海邊，有不少漁民都會喺旁邊交收魚獲，而市場內周圍都可以見到有食肆負責人喺度入貨，幾斤幾斤咁買海鮮﹗

喺沙巴見到大魚已經見慣不怪，但魚市場嘅賣價實在會令你驚訝，一條大魚可能 HKD100 都唔洗﹗

香港常見嘅魚如大眼雞同烏頭等，全部都大大條，而價錢亦只係 RM5 一斤，真係平到喊﹗

除左魚類，當然仲有其他海產啦﹗重點係相當平，售價可能只係餐廳嘅 1/3﹗

 

喺魚市場兜左個圈，心入面一直喺度諗，如果我地住嘅酒店可以煮食就好啦﹗從未見過咁平﹑咁巨大嘅海鮮﹗雖然買唔到，但魚市場內嘅攤販都非常 friendly，魚市場一行實在可以體驗到當地人嘅生活﹗

沙巴魚市場

地址：Jalan Tun Fuad Stephens

沙巴行程總覽：【沙巴】2014 五天沙巴陽光與海灘之旅