星期日一出酒店已經人頭湧湧，因為每個星期日朝早到中午，加雅街都會封路，變身市集﹗一早起身，行街前梗係要醫肚先啦﹗睇介紹加雅街有幾間咖啡室嘅喇沙都好好味，最後就決定左去最近酒店嘅馮業茶室﹗咁多人推薦介紹，品質味道就一定有保證啦，但最意想不到嘅係得到老闆熱情招待，介紹左幾款必試美食之外，仲教授左喺馮業食喇沙必試嘅獨門四味食法﹗
馮業茶室位於加雅街 100 號 (轉角位置)，採取半開放式設計，非常開揚，好容易搵﹗
餐廳雖然無冷氣，但因為半開放式設計，而且樓底夠高，所以唔會覺得好熱﹗同富源一樣，馮業都有提供自助式取餐同埋櫃台點餐﹗搵到位坐低後，問店員拎個 menu，決定好食咩之後出去 cashier order都得﹗
望住個 menu，超級三心兩意，咩都想試，諗左好耐都唔知食咩好﹗突然有人行埋嚟用廣東話推介左幾款野食，原來係熱情嘅馮業老闆﹗老闆極力推薦下，叫左馮業鎮店之寶 - 咖央白麵包同喇沙，同埋幾杯特色秘製飲品﹗老闆更再三叮囑，食喇沙之前要叫佢過嚟，等佢教我地食，如果唔係就食唔出特別之處…非常期待﹗
咖央白麵包，白麵包好鬆軟，散發麵包香味，中間夾住厚牛油同咖央醬，非常美味﹗
老闆極力推薦嘅馮業特製三層飲品同桔仔冰，各有特色，咖啡濃滑﹑桔仔冰酸甜度適中，消暑解渴﹗
最後，喇沙終於上桌，一放上檯就香氣四溢﹗而老闆見到喇沙已經 ready，就即刻跑過嚟教授馮業喇沙必試嘅獨門四味食法﹗
食法一 (Step 1)：先將半個青檸搾汁落湯，攪混，試下個原汁原味嘅湯式先﹗湯底以用蝦及多種香料煮成，味道香濃﹗
食法二 (Step 2)：將另外半個青檸搾汁落較淺色嘅橙色辣椒醬之後，再用匙羹盛起湯同放入橙色辣椒醬﹗第二種食法令湯底變得酸酸辣辣，亦唔會淹蓋左喇沙湯底原有嘅香味，令人胃口大開﹗
食法三 (Step 3)：老闆於湯底加入馮業自家調製嘅參巴醬，參巴醬帶有 D 咸香味，令喇沙味道更濃郁﹗
食法四 (Step 4)：最後，老闆將橙色辣椒醬同參巴醬拌勻之後落湯，更再三提醒食得辣嘅先好試﹗其實味道唔會真係辣到食噴火，但就令整個湯嘅層次更豐富，辣味喺口腔入面慢慢散開，刺激住味蕾，過癮又好食﹗
第一次食一碗喇沙可以食出四種唔同嘅味道同感覺，極富層次感，為味覺帶嚟嶄新享受﹗去沙巴馮業，識食一定咁食﹗
老闆真係非常熱情，食完喇沙仲介紹我地一定要食馮業嘅辣豆腐﹗豆腐外皮煎到脆脆地，上面有秘製醬汁﹑青瓜絲，味道酸酸辣辣，而豆腐就非常香滑，滋味無窮﹗下次去沙巴茶室，見到老闆不妨搵佢傾下計，老闆非常 friendly，介紹自己鋪頭嘅野食之外，更加會為你推介沙巴美食同必去景點﹗
馮業茶室
地址:加雅街100 號
營業時間: 07:00 ~ 01:00
沙巴行程總覽：【沙巴】2014 五天沙巴陽光與海灘之旅
Posts
No comments:
Post a Comment