【曼谷】無處不濕身﹒潑水節 『泰』狂野

第一次去曼谷參加潑水節，日日都濕身收場，但玩得非常興奮，下年一定要再去參加。如果你想去泰國參加潑水節，有一點係要堅記嘅 — 當地人向你潑水或者搽石膏粉都係代表善意嘅祝福意味，所以即使係一桶水咁倒落嚟，都一定唔可以嬲﹗而呢三日由朝到晚只要你走進曼谷嘅大街小巷，都隨時會被淋到成身濕晒，如果接受唔到，請避免喺潑水節期間去泰國玩﹗

玩左三日潑水節，由第一﹑二次俾人淋冰水覺得超凍同濕納納，到之後愈玩愈激，愈淋愈 High﹗先係一個微笑﹑再嚟一大桶水，到最後淋人同被淋嘅都笑到卡卡聲，充分感受到泰國人嘅熱情，而你都一定會被佢地所感染，全副武裝 ，三日由潮玩水玩到晚，亳無壓力的，跟泰國人一齊慶祝狂野嘅新年。玩完一年，決定明年一定要再戰潑水節﹗

潑水節於每年 4 月 13-15日一連三日舉行，亦即係泰國嘅新年。呢幾日係泰國傳統節氣入面一年之中最熱嘅三日，所以泰國人會互相潑水慶祝，亦象徵著上年唔好嘅運氣洗走，而慢慢潑水節就發展成狂野嘅街頭水戰 Party。

 

雖然 13 號先係潑水節，但 12 號大戰已經一觸即發，行 JJ Market 嘅時候已經中招﹗

出戰前準備

為大戰作好準備，有兩樣野係必需嘅 — 防水袋同水槍。隨身物一定要用防水袋封好，因為你永遠唔會知道幾時被襲擊。另外就係買番枝水槍，潑水節期間，曼谷周圍都會有售，如果怕講價，可以去 7-11 或者 Big C 買，明碼實價，價錢亦唔會特別貴。水槍款式非常多，多到眼花撩亂，要決定買可愛形定殺槍力形都諗好耐﹗

 

今次主要介紹兩個方便嘅潑水節 Party 戰場 — Central World 同 Asiatique The Riverfront﹗

Central World 戰場

Central World 前廣場嘅潑水節 Party 係一大重點戰場，而且交通非常方便，搭 BTS 到 Chitlom Station 就到，保證你樂而忘返﹗Central World嘅潑水節 Party分成四個區域，玩樂區﹑美食區﹑水戰區同埋泡泡派對﹗

玩樂區

玩樂區有多個攤位遊戲，旋轉木馬同摩天輪等設施，需要倒晒水槍嘅水先可以進入。

 美食區

美食區有 stage 表演，兩邊有各種泰式美食，而擺檔嘅大多都係 Central World 入面嘅餐廳，水準﹑品質都有一定保證。作戰攰左，肚餓要休息下再戰，可以去美食區食下野，唔洗怕入去商場冷氣太大冷親﹗

 

 

 

 

 

 

水戰區

不用多介紹，水戰區係大家互相用水槍攻擊嘅地方，中間有一個 stage，定時會有美女上去同台下嘅人開戰﹗記得要上好彈藥先入去﹗(如果無晒彈藥，可以去路邊地攤入水，一般入滿一次要 Baht 10，想重彈 D，不妨買枝冰水)

 

泡泡派對

除左水戰區，Central World 另一重點活動係泡泡派對﹗呢個 area 要倒晒水槍嘅水先可以進入，等入場嘅時候大會更會掟 D Bon Bon 棒出嚟派，旁邊會噴出大量泡泡，stage 上面有 live brand 演唱，置身其中，隨時會被泡泡淹沒，感覺超爽，真係 High 翻天﹗

 

Asiatique The Riverfront

河邊夜市 Asiatique The Riverfront 亦有大型 party，有 live brand，仲有啤酒飲添﹗而 Asiatique The Riverfront 出面街沿路亦有一群群慶祝潑水節嘅人，不停各路過嘅車同行人潑水同搽石膏粉，唔洗一個街口，已經全身濕透，氣氛十分高漲。

 

會場外面，亦有多個泰式小食攤位，要醫肚後再戰，絕對無難道﹗

 

 

最後提提大家，潑水節期間出入千祈唔好搭 Tuk Tuk，因為 Tuk Tuk 係路邊嘅人淋水嘅頭號目標﹗