【台北】皇帝般享受火鍋體驗 - 這一鍋皇室祕藏鍋物

去台灣一定要食麻辣鍋﹗這一鍋皇室祕藏鍋物係85 度 C 進軍火鍋市場嘅人氣熱店，更號稱服務如王品，麻辣如鼎王。唔想排隊，出發前就去 EzTable 預早訂位，去體驗一下宮廷式火鍋。這一鍋皇室祕藏鍋物裝潢古色古香，裡裡外外都令人有一種中國皇室嘅感覺，好似去左電視城嘅宮廷食火鍋一樣。食物質素好，鍋底味道亦令人一試愛上，到依家都仲好懷念鍋底內鴨血嘅滋味﹗

中山北殿店位於中山北路上，距離捷運民權西路站大約 10 分鐘路程，門口就會見到充滿中國傳統宮廷感覺嘅裝飾，好容易搵﹗

門一打開，就好似時光倒流到皇室年代一樣。『這一鍋』以黑色為主調，並以黃燈營造出高雅而有氣勢嘅氣氛，店內裝潢都富有中國傳統感覺﹗門口放著黃金鍋具，在暗黑嘅環境下，顯得更閃閃發光，貴氣大足﹗

以包廂形式分隔座位，用餐環境隱私度高。

入座後，店員就會熱情招待，更會細心地介紹鍋底同埋特別嘅鍋料，由特色至烹煮方法都會解釋得好清楚，服務態度非常好。

店中央有自助取用嘅醬料區，有多種調味料選擇，包括蔥花﹑醬油、蒜泥、祖傳腐乳醬等。不過個人覺得『這一鍋』鍋底味道已經足夠，唔需要再沾其他醬料。

每桌都會有這一壺七葉羅漢茶，以七葉膽與羅漢果即時沖泡，所以要等兩﹑三分鐘先可以飲﹗古色古香嘅茶壺倒出熱茶，帶一點點苦澀，入口回甘，有去油解膩嘅作用。

除左熱茶，『這一鍋』亦會俸上裝喺一支支試管入面嘅冬瓜檸檬冰沙﹗冬瓜檸檬冰沙口味酸酸甜甜，打邊爐嘅時候飲感覺特別冰涼，同樣可以幫助去除火鍋嘅油膩感﹗

好似奏摺一樣嘅 menu，好有氣勢﹗

『這一鍋』 以中國文化為背景， 以武則天時期祕傳的「榮華富貴」鍋同埋清康熙宜妃最愛嘅「滋補養生」鍋為概念，調配鍋底。三足鍋鼎上亦清楚印著「榮華富貴」、「滋補養生」，宮廷感濃﹗

『這一鍋』提供四款鍋底選擇，除左鳳凰回巢鍋外，其他都以人頭收費，而鴛鴦鍋就需另加 NT. 150。今次就選擇左鴛鴦鍋，御膳麻辣鍋同老火湯﹗

老火湯以豬大骨同雞骨等長時間精燉熬煮，帶一點點藥膳味道，唔會覺得油膩，令人想飲完一碗又一碗。而御膳麻辣鍋就以多種辣椒調配，鍋底有鴨血同埋板豆腐。如果你想去食麻辣食到流汗噴血的話，就可能會失望。『這一鍋』麻辣湯麻而不辣，香味十足，令人想一再品嚐﹗

鍋底嘅鴨血特別值得推介，非常嫩滑，無腥味之餘更吸滿湯汁。鴨血同板豆腐都可以無限續加，鴨血好食到加完一次又一次呀﹗

招牌神仙牛肉 (NT. 388)，一塊塊牛肉片吊掛喺架上面，加上底下嘅乾冰煙霧襯托，單係望住已經夠晒賞心悅目。牛肉片係美國 Choice 等級嘅牛小排，油脂分佈平均，肉質滑嫩，牛味十足。

到訪當日，『這一鍋』有下載 APP 就送梅花豬肉嘅活動，一心諗住最多都係送一小碟，就下載一試。點知店員放低嘅竟然係同單點一樣嘅份量，實在非常驚訝，『這一鍋』嘅服務太好了吧﹗

獲GAS認證嘅穀飼豬肉即點即刨，肩胛肉部位切成薄片，肉嫩有嚼勁，非常味美﹗

香滷大腸頭 (NT.248)，大腸內嘅肥膩油脂滷都被一早處理，大腸內質彈牙，不單唔會有任何腸嘅怪味，滷過嘅大腸放喺鍋底愈煮愈入味。

五彩鮮蔬盤 (NT.198) 擺盤精緻，含有五色蔬菜，包括高麗菜、紫山藥、西蘭花、玉米筍、紫椰菜，所有蔬菜喺老火湯底到煮都好鮮甜﹗

 老油條 (NT.58)，食麻辣鍋點少得油條﹗油條吸盡湯汁，令人欲罷不能﹗

這一鍋皇室祕藏鍋物

地址：這一鍋皇室祕藏鍋物(中山北殿) 台北市中山區中山北路三段31號
電話：+886-2-6613-1336
營業時間：11:30 - 24:00
官方網頁：http://www.toponepot.com/
EzTable 訂位：http://www.eztable.com/search/這一鍋皇室祕藏鍋物