【潮玩香港】閒遊昂平360﹒動感新體感

返左嚟香港咁耐，都未去過昂平360﹗今次要感謝昂平360嘅邀請，等我可以趁住好天氣去昂平行下，而且仲可以 欣賞到全新360舞臺嘅精彩表演同埋體驗下360動感影院﹗

昂平360係熱門香港旅遊景點之一，到訪當日係平日，但都係咁人山人海﹗建議大家如果想搭昂平纜車，就一定要先於昂平360網站訂定票，因為網上訂票條隊係同現場售票處分開嘅，亦未見人龍﹗

拎左飛之後就可以去候車站，乘坐水晶車廂的話，職員會提供一條手帶作辨認。

 

每部纜車最多坐 10 個人，如果唔想同其他人一齊坐，不妨約齊班 friend 一齊去﹗今次乘坐嘅係水晶車，全透明車底設計，可以清楚見到腳下面嘅景物﹗

上左纜車，職員會好快咁幫你影張大合照，而照片到落車嘅時候已經可以有得買﹗一上纜車就要 get ready，影張靚相喇﹗

水晶纜車絕對值得一試，低頭望望，好似有大地在我腳下嘅感覺﹗

昂坪纜車連接大嶼山東涌市中心同埋昂坪，全長 5.7 公里，沿途可以飽覽北大嶼山郊野公園﹑天壇大佛嘅景色﹗途中更可以清楚睇到香港國際機場，好彩的話更可以見到飛機升降添﹗ 眼前同腳下風景咁靚，25 分鐘嘅車程轉眼就過﹗

昂坪市集以仿鄉村式的設計建築，簡潔樸素，亭台樓閣亦表現到傳統建築風俗文化。雖然好多遊客，但到左昂坪市集之後亦唔會覺得好擠擁，感覺都幾悠閒，可以放慢腳步，慢慢周圍行下。

全新嘅360舞臺同動感影院為寧靜嘅昂平市集富予生動嘅一面。走進360舞臺外面以彷舊式影院設計，外牆上印有彷手繪電影廣告畫，更不時有穿上古裝嘅工作人員出嚟大耍武功同埋與遊人拍照留念。

走進360舞臺，感覺有如回到舊時，裝潢參照舊戲院打造，牆上貼有武打明星電影海報，入口附近更有個假售票處添﹗

去之前以為360舞臺係睇動作電影，點知原來佢係真係一個 live show 大舞臺﹗一開始會先介紹電影中各聲效、燈光同埋特技效果可以營造嘅氣氛效果。再來係模仿李小龍嘅武打演出﹑白髮魔女傳同埋一代宗師葉問詠春打鬥表演，演員由台上演到台下，非常落力﹗期間更有多個與遊客互動嘅環節，觀眾都可以參與演出，試下拉威也鋼線﹗刀光劍影，連場打鬥，25 分鐘親歷電影製作嘅表現，認識香港武打電影，大人細路都睇得非常投入﹗

睇完武打電影製作，即刻過去側邊嘅360動感影院﹗影院只有 21 個座位，職員亦會派發3D 眼鏡﹗坐上會移動嘅椅子﹑戴上眼鏡﹑扣好安全帶，飛行器就出發喇﹗由飛行器帶領下，以另一個角度去感受大嶼山各個景點。360動感影院嘅影片製作得很不錯，提供 4D 體驗，畫面上嘅美景好有感染力，原來大嶼山真係有好多值得去嘅好地方﹗

睇完戲，閒逛一下昂平市集，坐低食碗山水豆花，入廟拜神，唔經唔覺就過左大半日。平時返工咁辛苦，有時間到咁悠閒嘅地方走走，確實好 relax﹗

 

 

 回程嘅時候開始日落，天空被慢慢染紅，纜車外呈現左不一樣嘅美景。

特別鳴謝：昂平360