【掃食香港】人氣獨特八色小籠包進駐香港 - 樂天皇朝

來自新加坡嘅人氣食店樂天皇朝最近在銅鑼灣利舞臺開業，主打梗係獨家八隻不同顏色同味道嘅小籠包啦﹗

樂天皇朝空間非常寬敞，古典並冠冕堂皇，而且經常坐無虛席，如果去食晚飯的話就要早少少，平日 7 點半過後就有好多人等位，而如果需要訂位就要 7 位以上先可以。雖然裝潢佈置都非常華麗，但樂天皇朝嘅消費卻非常親民，八種口味小籠包一籠亦只係 HKD88。

八味皇朝小籠包有原味、人參、鵝肝、黑松露、芝士、蟹粉、蒜香及麻辣口味。賣相繽紛，視覺效果做足一百分﹗如果你係一個人食晒一籠，就可以依照樂天皇朝嘅最佳品嚐小 tips，由最淡味嘅原味開始食到去最濃味嘅麻辣小籠包。小籠包皮薄但唔會好易穿，用筷子輕輕夾住小籠包頂部就可以輕鬆拎起小籠包又唔怕整穿，各味嘅小籠包都注滿湯汁，而個人覺得特別滋味嘅係黑松露同鵝肝口味。

人參味清香甘甜，湯汁帶有人參湯味 ﹑鵝肝味帶出淡淡甘香口感﹑黑松露味細膩郁香，菌香味於嘴裏縈繞不散﹑芝士味咀嚼時芝士溶化於口內﹑蟹粉味以蟹肉包製而成，用料十足，湯汁特別鮮甜﹑蒜香味唔會太 over，口味調教得剛好﹑麻辣味辣味唔會太強烈，但就辛香無比。樂天皇朝嘅八味小籠包味道創新 ，令人回味無窮。

除左招牌小籠包之外，樂天皇朝亦有供應各式各樣嘅菜色。

 

 涼拌黑木耳 (HKD42)，木耳脆身爽口，伴以酸辣調味，帶有麻油香，清新醒胃。

三色瑪腦蛋 (HKD48)， 以皮蛋與鹹蛋製成，賣相非常吸引，入口溢出香濃嘅鹹蛋味，但略縑鹹蛋味過濃，淹蓋左皮蛋嘅味道。

清燉雞湯 (HKD52)， 燉盅精緻，雞湯非常足料，味道清甜，而雞肉就依然保持得嫩滑。

 四川水煮牛肉 (HKD108)，味道不錯，可惜厚切牛肉不夠嫩滑。

除此之外，樂天皇朝亦有供應多款中式甜點，當中檸檬蘆薈桂花蜜 (HKD26)清甜，加上蘆薈 QQ 口感，而檸檬蘆薈味道亦正好喺食到咁飽嘅時候消消滯。

樂天皇朝 Paradise Dynasty

地址：銅鑼灣波斯富街 99 號利舞臺廣場 6 樓
電話：2177 0903
Facebook 專頁：https://www.facebook.com/ParadiseDynastyHK