【台北】今夏親子同遊推介 - 一次玩盡文創園區三大特展

相信好多朋友都會趁著放暑假，一家大細去旅行，而距離香港只需個多小時飛機嘅台北一定係熱門旅遊點。今個夏天，台北華山 1914 文創園區就舉辦左三個適合親子同遊嘅大型特展，包括大熱動漫 One Piece 特展﹑小朋友最愛嘅 Lego 村同埋認識大自然生態嘅珍貴動物標本展﹗唔單至咁，Line 亦於華山設立左 pop-up store，睇完展覽，仲可以去買大量 Line 限定商品。台北華山 1914 文創園位於台北市中心，只要搭乘捷運到忠孝新生站，1 號出口沿忠孝東路直行就到，可以話係鬧市中嘅清泉， 讓你可以放慢腳步，靜下來欣賞展覽嘅好地方。

《ONE PIECE 航海王展》

香港 Times Square 有 One Piece 展覽，唔少朋友都爭住去同大型展品影相﹗台北《ONE PIECE 航海王展》由原作者尾田榮一郎監修，更係第一次於日本以外國家舉辦的大型特展，One Piece 迷又點可以錯過﹗場內以視覺效果映像及手稿展出為主，而且嚴禁拍攝﹗

夥伴們，一起冒險吧！ 《ONE PIECE 航海王展》以映像、手稿、體感三大元素分左 11 個展區，場內掛滿琳瑯滿目嘅手稿同埋漫畫，沿路一直走會經過 3 個小劇場，製作都非常認真，透過動畫特效加上震撼聲光特效，帶你走進魯夫一行人「偉大的航路」嘅冒險旅程﹗

特展嘅最尾係紀念品區，選擇超過 50 款，One Piece 迷又點可以錯過買特展紀念品嘅機會﹗

《ONE PIECE 航海王展》展覽日期至 9 月 22日，每日開放時間由 09:00-21:00。

《Fun大吧！積木村》

話明適合一家大細嘅節目，又點少得小朋友最愛嘅 Lego 呀﹗《Fun大吧！積木村》將細小嘅 Lego 積木屋放大，踏入展區就好似進入左一個卡通城市一樣，非常壯觀！

場內有多達 11 款放大版的 Lego 積木屋造景，仲有一個個唔同造型嘅放大版 Lego 人仔，場內小朋友興奮得尖叫聲不絕，個個都開心到不斷要求父母為自己拍照。

每座 Lego 積木屋都有各自代表生活入面衣食住行嘅主題，包括餐廳、花店、麵包店、郵局等，真真正正係一個 Lego 城市。而且 Lego 積木屋入面嘅裝飾都非常細緻，好似麵包店入面有由積木砌成嘅糕點﹑服裝店入面亦掛住一件件 Lego 衫仔…

《Fun大吧！積木村》展覽日期至 9 月 14日，每日開放時間由 10:00-18:30。

《野生動物大遷徙》

因為時間關係，未有進入《野生動物大遷徙》展館參觀。《野生動物大遷徙》首次展兇大大小小四十幾隻動物標本，小朋友可以近距離觀看全球最大白犀牛，仲有梅花鹿、山羊、老虎等動物標本。場內更設有生態食物鏈情境區，讓小朋友可以學習到自然生態嘅食物供求關係鏈。

《野生動物大遷徙》展覽日期至 9 月 8 日，每日開放時間由 10:00-18:00。

《Line Friends 夏日限定 POP-UP Store》

走之前，一定要去《Line Friends 夏日限定 POP-UP Store》買埋 Line 限定精品啦﹗ 

 POP-Up Store 有多種 Line 正版授權商品，公仔﹑滑鼠墊﹑立體造型卡片﹑紙玩具﹑磁石﹑Memo 紙﹑notebook﹑ T 恤﹑ iPhone/S4 專用背蓋等，實在係多不勝數﹗

 

 POP-UP store門外仲有大型公仔，大家都爭住同自己最愛嘅 Line 主角合照﹗

《Line Friends 夏日限定 POP-UP Store》開放日期至 8 月 31 日，營業時間：週一至四  11:00-20:00；週五-週日  10:00-21:00。

除左以上特展之外， 華山 1914 文創園區亦有幾間特色餐廳同 cafe。行到攰就可以坐低休息下，真係可以玩足一日。

華山 1914 文創園區

地址：台北市中正區八德路 1 段 1 號
電話：(886) 2 2358 1166
營業時間：9:30am - 10:00pm
官方網頁：http://www.huashan1914.com