【掃食香港】抵食日式岩石燒小店 - 石一燒

無諗過大角咀奧海城附近的鐵樹街會有咁正的石燒餐廳！石一燒店址極不起眼，在一個公園仔旁邊，以小店形式經營，店內只有5、6張檯，想食的話就最好先訂位喇！ 

石一燒以提供岩石燒套餐為主，亦有少量單點菜單，而岩石燒套餐可以話抵到爛，最平 $168 就有交易，套餐有齊肉類主菜、沙律、味噌湯、三款前菜、烤菇、香飯和甜品，真係一個人都未必食得晒！

石一燒亦有提供每日精選食材供應，包括生蠔、生蝦等﹗

未上燒肉，先歎沙律和頭盤﹗頭盤由左至右食或者由右至左食都一樣咁正，睇下你鍾意由甜食到辣定掉轉由辣開始食多D！辣螺最驚喜，辣辣地夠過癮，實在想大叫 ENCORE！

主菜好了！店主細心地將爐 SET 好，再帶上隔熱手套，將在焗爐內已經燒到 250 度高溫的花崗岩放上﹗

當日就點左美國安格斯西冷 (上圖左) 和澳洲和牛牛小排 (上圖右)，推薦澳洲和牛牛小排，擁有漂亮油花，肉質鮮嫩多汁，而美國安格斯西冷就較有嚼勁。

只要將牛放上岩石上燒一分鐘，之後其他各邊再燒 30-45 秒左右就食得﹗經高溫岩燒，完美封住肉汁，牛肉特別香！

石一燒仲有提供多款手工啤酒，可以慢慢試，慢慢歎！

 

石一燒

地址：大角咀鐵樹街10號富多來新邨一期地下13號舖
電話：5281 5420
營業時間：星期一至日 18:00-22:00
只收現金