【沙巴】大件夾抵食 - 海邊無名海鮮大排檔

去沙巴一定要食海鮮﹗去之前做 research，搵到唔少有關海皇城[﹑雙天﹑大茄萊… 嘅分享，但大家對幾間餐廳都無一致嘅評語，有 D 人話好抵食，但有 D 就話會俾人斬到一頸血，真係一直都無決定到去邊間食好。

第一日落機 check-in 之後過左酒店對面富源食 tea，之後就無特別編排到行程，只係喺亞庇市內周圍行下。行到去 Point Jesselton Ferry Terminal  飲完野﹑睇完日落之後，就出發搵食﹗沿著海邊一路行，一路再上網 search 下究竟食邊間海鮮好，但始終仍然好怕會俾人斬到一頸血。行行下，突然見到遠處有好多大排檔帳篷，有幾間賣嘅海鮮大排檔，經過已經香氣撲鼻，而且明碼實價，就決定喺度開餐。

呢個無名海鮮海邊夜市一 D 都唔難搵，只要沿海邊行，你就會見到有一條大劍魚嘅大迴旋處，再向前行就係 Waterfront 廣場，向前望就會見到一個個大帳篷。

夜市入面有好多唔同嘅檔口，有賣水果、蔬菜、飲品、甜品，當然唔少得海鮮檔啦﹗夜市有大約四﹑五間較大規模嘅海鮮檔，望住每張長檯上面放滿左唔同種類嘅海鮮，真係花多眼亂﹗兜左一個圈，最後決定幫襯一入到去右手邊嘅第一檔 (靠海邊果檔)，因為呢檔 D 海鮮望落去較新鮮，而且食野嘅 area 亦都光猛 D﹗

決定幫襯邊檔之後，第一樣要做嘅係揀海鮮。睇中邊樣，就可以直接問價錢，而 staff 亦會即時喺你面前磅重量，話番俾你知幾錢，如果岩嘅話，就會問你想用咩方法煮，再即刻放入籃，等身後嘅廚房鑊炒，絕無取巧﹗呢度嘅大排檔海鮮價錢真係平到你唔信，地道之餘，亦都煮得又有鑊氣又好味，非常抵食﹗

去到沙巴，點可以唔食超大隻老虎蝦﹗大過手掌咁大隻都只係大約HKD70一隻 ，抵到爆燈﹗雖然係冰鮮，唔係即炒生猛蝦，但呢碟參巴醬炒老虎蝦依然鮮味十足，肉質甜美，大蝦頭入面蝦糕滿溢，加上參巴醬汁，辛辣中帶出鮮甜，又香辣又惹味。

另一味必食之選係花甲，1KG 花甲都只係 RM10，大約 HKD24 左右，真係抵到爛﹗揀左用蒜茸洋蔥清炒，花甲肉夠厚身，新鮮又大隻，比香港食到嘅更甜。而且炒得火喉剛好，唔韌又夠鮮味 。加上有加入少少金不換炒香，口味更加豐富。

食海鮮梗係唔少得魚啦﹗問老闆有咩好介紹，二話不說就幫手揀左條魚，size大約有兩隻手咁大，亦都只係賣 RM18，即係 HKD50 都唔洗，平到想驚叫﹗見到現場有好多人食類似甜酸松子魚嘅做法，而且好香，就點嚟試試﹗

大廚先將魚開邊落鑊炸至香脆，然後再將煮好的甜酸汁淋喺魚上面﹗魚外皮好鬆脆，而裡面嘅魚肉就帶嫩，但就一 D 油膩感都無。醬汁口味甜酸適中帶微辣，亦加入左爽甜嘅翠玉瓜，惹味得嚟又不失清爽，真係甜酸鹹辣鮮香兼備，十分開胃。

食左一晚都唔夠，第二日出島玩完，食完肉骨茶之後，一行 5 人都決定要再番去食宵夜 encore﹗試試新野，叫左個炒辣蟹同清蒸魚﹗

炒蟹一碟都只係 RM20，蟹上淋上之前食過嘅酸辣魚汁，但今次就較偏重於辣味，非常刺激。辣味亦能夠充分帶出蟹肉嘅鮮甜味。

清蒸魚，RM20 一條，有幾抵應該唔需要再多講﹗類似中式嘅蒸法，魚好鮮甜，而肉質亦非常嫩滑﹗

自從去沙巴食過咁好味又咁平嘅海鮮之後，返到香港一直都無意慾想食海鮮﹗沙巴海鮮嘅鮮味，令人非常難忘﹗另外，亦唔好睇少大排檔，呢個無名夜市嘅大排檔又乾淨，煮野食又夠鑊氣又好味，最重要係夠晒抵食，唔怕俾人迫你食貴野﹗

沙巴行程總覽：【沙巴】2014 五天沙巴陽光與海灘之旅