【掃食香港】速試日本人氣 SHABU SHABU - 溫野菜 @海港城

溫野菜在日本有超過 300 間分店，係日本人氣 SHABU SHABU 專門店之一，殺到嚟香港，在海港城 LCX 正式開業，邊爐精第一時間就衝去試試﹗打電話去 book 位但已經 full 左，只接受 walk-in﹗唔知係咪 weekday 加上剛剛開張嘅關係，等位嘅人唔多﹗等左幾個 number 就順利入座﹗

入門口會經過長長嘅出菜口，展示左各種由日本由福岡、鹿兒島、熊本、北海道等地直送嘅食材﹗

有別於日本，香港溫野菜並未有提供放題，可以選用套餐或單點﹗單點配料唔算太貴，蔬菜類大約廿蚊一份，而牛肉價格亦算便宜，最高級的佐賀 A5 黑毛和牛西冷只係 $168﹗

 前菜點左一份明太子青瓜，青瓜爽脆鮮甜，明太子帶點點辣勁，味道好夾，非常美味。

火鍋湯底一共有八種，大部分都只係 $29。今次試左三款湯底，包括骨膠原柚子塩湯、秘傳月見壽喜湯同埋藥膳湯。骨膠原柚子塩湯帶著淡淡柚子清香，湯的味道唔會太鹹同油膩﹗

藥膳湯包含 12 種藥膳，包括杞子﹑草果﹑龍眼﹑花椒﹑金針﹑蓮子等等，店員會先放好清湯，再拿將藥材放入湯底。藥膳湯充滿藥材香味，味道較濃，煮菜非常好食，不過缺點係愈食愈鹹﹗

溫野菜各個湯頭本身已經夠味，但以兩款特製醬汁配肉，依然不錯。柑橘醋及胡麻醬。橘醋醋清新酸香，胡麻醬入口滑順，帶濃郁麻香。

日本料理一絲不茍，溫野菜更特製隔湯用碗，可以先瀝乾食物上嘅湯，避免醬汁越來越大碗，攪到走晒味。

點左四款肉，熊本豚肉眼﹑熊本豚梅肉﹑佐賀 A5 黑毛和牛西冷及鹿兒島黑毛和牛肩脊肉，肉質不錯，帶油脂但不會感覺太油膩，價錢唔算太貴，但就未算特別出色﹗

溫野菜嘅蔬菜類比肉類出色﹗每一款都非常新鮮，充滿水份，只要稍微涮煮就食得，清甜可口﹗

麻辣免治雞肉味道幾特別，有麻辣香味，口感紮實。

最後，來一客紅豆夾餅，外皮香脆，配埋紅豆雪糕，唔會太甜，SHABU SHABU 之後食感覺特別爽﹗

溫野菜

地址：尖沙咀海港城LCX
電話：2153 1801
營業時間：12pm - 11pm
Facebook 專頁：溫野菜

【掃食香港】撐小店，新蒲崗越南 Phở - 北正宗

唔講你未必知，全世界最好食的越式牛肉粉 (Phở) 唔係喺越南，係澳洲﹗就連蔡瀾都唔只一次講過全球最好食的越南餐館係位於 Melbourne 的勇記﹗雖然我唔覺得勇記特別好食，但在澳洲讀書幾年，實在令我深深愛上牛肉 Phở ，經常性每日一 Phở，久而久之，令我成為 Phở 精﹗返左香港幾年，一直都搵唔到一間餐廳嘅 Phở 係 okay 嘅﹗聽聞新蒲崗開左間越南食店，就馬上衝去試試﹗

北正宗位於新蒲崗景福街，喺 Mikiki 附近，唔難找﹗店裝飾簡約清新，湖水藍色調﹑木傢俱加上盆栽擺設及大玻璃窗，感覺有少少似 cafe。

北正宗食物選擇都幾多，除左湯粉之外，越式沙律﹑小食﹑海鮮，連越式火鍋都有，不過需要預訂，下次真係要試試﹗北正宗更提供假日特餐，平均只需五﹑六蚊，跟餐飲品仲可選越式滴漏咖啡，可以話非常抵食﹗另外，亦可選附有小食嘅精選套餐。

點餐後，店員就會送上食 Phở 絕不能缺少嘅三寶 - 金不換、辣椒粒和青檸，特別嘅係…仲有油炸鬼﹗老實講，食左咁多唔同餐廳嘅 Phở，由澳洲食到香港到胡志明市，都未試過以油炸鬼沾湯 Phở 食，油炸鬼吸盡湯汁，感覺幾特別﹗

湯頭係 Phở 嘅靈魂，湯底味道基本上 90% 決定左碗 Phở 好唔好食﹗北正宗嘅 Phở 湯清徹不油膩，但味道稍淡，缺少左 D 香料味，加入金不換、辣椒粒，再加少少桌上嘅辣椒醬 ( Tương Ớt)，味道馬上有所提升，濃少少亦帶出些少湯頭甜味﹗河粉幼滑，牛肉為厚切，但入口肉質嫩滑，但牛肉份量相對地有 D 少﹗

 

個人認為海防鮮蟹肉金邊粉比牛肉 Phở 更有驚喜﹗比傳統檬要 (蕃茄蟹粉湯檬) 淡味 DD，但湯頭鮮甜香濃，用嚟點油炸鬼就更加過癮﹗

越式滴漏咖啡味道香濃，煉奶令口感變得滑順，同 Phở 絕對係 prefect match﹗

北正宗嘅牛肉 Phở 唔喺香港嚟講，味道已經係好唔錯，加上價錢又抵食，店內多個小細節都睇得出老闆用心經營，必定會再去試試晚餐，支持小店﹗

北正宗

地址：新蒲崗景福街87號地舖
電話：2780 6080

【澳門】過大海，未去賭場前先去『贏到粥』滾滾下

去過澳門咁多次，每次都希望可以搵到 D 新野食﹗前排聽聞有間火鍋店深受澳門人追捧，經常爆滿，又點可以唔試下呀﹗

贏到粥位於媽閣廟附近，隱身於豐順新邨小巷﹗一個唔留神，真係隨時會行過左﹗

贏到粥以提供廣東順德菜色火鍋為主，當中有幾大招牌包括：冬瓜粥底火鍋﹑順德大盤魚﹑火焰鵝等等﹗而今次食嘅卜卜蜆係贏到粥一大招牌菜，愛蒜者必試﹗
 
一大鍋卜卜蜆足夠兩個人食，只係 MOP138，可另外再加點火鍋料﹗卜卜蜆以大量蒜蓉和蜆，再加入蔥、辣椒同清湯打造的鍋底﹗

 一滾起，蜆就會逐一打開，接二連工發出「卜卜」聲﹗蜆肉非常鮮甜，再加上蒜香味，真係會令人想食完一隻又一隻，食唔停口﹗

鍋底有咁多蜆，相信湯頭有幾咁鮮味已經唔需要再多加介紹﹗極力推薦加點配料勝瓜同埋粉絲，可以吸盡湯汁的鮮美滋味﹗

食完『贏到粥』去賭錢會唔會贏到足可能係一個迷，不過肯定你去完之後一定好滿足，捧著個肚走﹗

贏到粥

地址：澳門媽閣河邊新街豐順新邨第三座地下
電話：+853 2896 7899
營業時間：晚上 6 時 - 凌晨 2 時

【掃食香港】觀塘工廈隱秘潮聖地 - oldish

每次出觀塘搵食都有新野試﹗oldish 可以話係上環熱門 cafe 之一，最近進駐觀塘工廈，地方大到不得了，加上高樓底，店內空間感十足﹗Growth Ring & Supply 木製傢俱﹑Alternative Country 皮革產品，工業風格裝潢，oldish 集 Cafe + Fashion + 皮革工房於一身！

oldish位於巧明工廠大廈 5 樓，工廈非常舊，由小巷進入電梯大堂，連 lift 都係最舊或要用手關門先開嘅升降機，某程度上真係好配合 oldish 走嘅工業風格﹗一打開大門，就見到左手邊好似時裝店一樣嘅陳設，潮流指數爆登﹗

 店內售賣嘅大部分市衣飾都係手作設計，擺設亂中有序﹗

 Alternative Country 手製皮革產品整齊排列，非常壯觀﹗

最旁邊連皮革工作室都有，相信店內售賣嘅某 D 產品都係喺呢度誕生，唔知遲下會唔會有皮革創作班呢﹗

行下行下，真係以為自己去左 shopping，差 D 唔記得要醫肚﹗言歸正傳… oldish 店內右手邊係 cafe area﹗長長嘅廚房同水吧，可以見到店員好有效率地準備食物﹗

店內有幾張向牆嘅二人檯同埋幾張大檯，水泥牆身﹑木材桌椅加上懷舊擺設，相當有風味。

以厚英文書夾著 menu，set launch 大約一百蚊倒，包餐湯同飲品﹗

舊式漱口做凍飲杯，上面清楚印著 oldish 嘅 logo，夠晒 vintage﹗

All day breakfast 係 oldish 嘅招牌菜， 有腸、煙肉、焗豆、多士、煎蛋、炒磨菇、薯餅等等，份量好大。

另外點左泰式醬汁豬肋骨，醬汁酸酸辣辣好醒胃，可惜豬肋骨太乾﹗

oldish 環境一流，坐得幾舒服，咖啡亦都唔錯，但喺食物方面真係有改進嘅空間﹗得閒去 oldish 飲杯野，睇下書，扮下潮人都唔錯﹗

Oldish

地址：觀塘巧明街99號巧明工廠大廈5樓AB座
電話：3462 3288
營業時間：10am-6pm