前幾日同阿媽講起暑假荔園會喺中環海濱重開，佢就一輪咀咁問左我十幾廿個『你記唔記得舊時...』問題﹗感謝邀請，尋日下晝可以去今個暑假一大焦點 event 「荔園Super Summer 2015」玩過夠﹗
坦白講，自己對荔園嘅記憶唔算好強烈，不過就好記得細個嘅時候同爸爸媽媽去玩嘅小小片段... 仲記得以前好鐘意玩荔園叮叮船同埋 踫踫車... 仲有唔知點解細個會好驚入荔園動物園，但又成日俾阿爸迫去嘅畫面等等﹗過左咁多年，已經無機會再成家人一齊重遊荔園... 不過我認為今個暑假最少要去荔園三次﹗一次帶爸爸媽媽去尋回『舊時』嘅快樂記憶、一次同班 Friend 去玩餐飽加講『舊時』、一次同小朋友去話俾佢地知自己『舊時』就是這樣長大的！
「荔園Super Summer 2015」由今晚六點起一直開到 9 月初，而且仲係免費入場添﹗玩遊戲就要俾 token，10蚊一個，機動遊戲大約需要 2-8 個 token，而大部分攤位遊戲就只需要 2 個 token，中獎機會仲非常高添﹗無論你係咩階層﹑咩年紀，都可以去荔園重拾童真﹗
一入門口就會見到 TINO 再現，機械版 TINO 每半小時就會表演排便一次，仲識得噴水同眨眼添﹗只需 1 個token，就可以拎兩條蕉餵呢隻吸蕉大笨象﹗
荔園另一大象徵又點少得恐龍屋，恐龍屋由以前個恐怖外星樣變身滑稽恐龍，恐龍尾就變左一條五米高滑梯，非常可愛... 如果佢好似以前咁突然大叫可能更有氣氛﹗
荔園舊鬼屋亦與時並進，魔靈小學要用手機下載 app 配合 AR 技術嚟收伏厲鬼，厲鬼出現喺手機屏幕上，都咪話唔恐怖﹗
覺得滑稽恐龍屋同魔靈小學都太刺激？仲有好多經典機動遊戲可以玩﹗
 |
| 快樂叮叮船 |
 |
| 鬼馬飛天椅 |
 |
| 新巴城巴<開心列車> |
 |
| 淘氣小木馬 |
玩完機動遊戲，一定要玩埋攤位遊戲先走，又玩又拎先夠 high﹗大部分都只需要 2 個 token，而且遊戲易玩得嚟，中獎機會仲非常高添﹗埸內所見，十個人入面有五﹑六個都可以捧住大獎公仔走人﹗中唔到大獎的話，可能都可以拎走一堆中﹑細獎﹗而且... 估都估唔到，上左年紀嘅公公婆婆比年輕人更厲害，應該係因為『舊時』都喺荔園訓練有數，見住佢地個個都童真盡現，睇到都覺得好 warm﹗
必玩逃學威龍﹗只要將粉刷扔向紙板學生，扔中又唔跌就係你贏。而且只要扔中頭就有大獎，眼見勁多人都成功拎走大笨象﹗
彩色乒乓波細獎無走雞﹗無需技術，將碌乒乓波碌中藍色有五分，黃色有三分，綠色就有一分。好容易就可以拎走細笨象一隻﹗
「甩」牌高手必玩荔園對一對，限時30秒「甩」中指定圖案就有獎﹗
經典掟香口膠，一個 token 就可以換兩個代幣﹗只要掟中白色階磚又唔踩界就有排綠箭香口膠﹗如果掟到橙色階磚，就可以拎走巨型綠箭 Cushion﹗
溫馨提示，攤位零零舍舍有一個橙色階磚係響最外圍，最近自己嘅﹗攻果個最易中，即刻變身綠箭俠﹗
購物狂們玩完一定要去 Milk Cargo，荔園 x Milk 商品，懷舊得嚟又夠潮，玩味十足，真係好難忍手﹗
呢個荔園 token 都極具收藏價值，不如唔好玩晒佢，留番幾個收藏下啦﹗
荔園Super Summer 2015
日期：2015 年 6 月 26 日至 9 月初
開放時間：上午 11 時至晚上 11 時
地址：中環龍和道9號中環海濱活動空間
