【日本】九州熊本 Kuma Bar 同萌爆 Kumamon 啤啤佢

去到熊本，萌爆 Kumamon 可以話無處不在，無論是 Travel map、商場、JR 、藥妝店同精品店，都可以輕易捕獲「熊」蹤﹗食完飯，當然要去 Kuma Bar 同萌爆 Kumamon 啤啤佢 ﹗

Kuma Bar 位於熊本市中央區最熱鬧的下通商店街，入口位置不太明顯，檯頭望一望，見到萌爆熊本熊的話，就代表你搵岩地方﹗

上樓梯已經會被熊本熊包圍﹗

Kuma Bar 地方唔算好大， 大約只有 20 個座位左右。一入門口就會見到熊本熊背脊，坐左喺吧檯位置。另外，Kuma Bar 都設有 4﹑5 張四人座位。

聽講 Kuma Bar 長期爆滿，要坐到熊本熊旁邊的吧檯位置絕非易事﹗唔知係太幸運定咩原因，到訪當日竟然一個人都無，唔洗排隊之餘，梗係要坐熊本熊旁邊啤啤佢啦﹗

 

 唔識日文唔緊要，Kuma Bar 有一份會話表，指指點點就可以順利 order 到﹗

球磨燒灼係熊本縣名物之一，Kuma Bar 內就可以品嚐唔同廠的球磨燒灼和清酒。吧檯前方更擺放左好多熊本熊限定版清酒，非常可愛﹗

飲野都可以 shopping，粉絲必搶，萌爆 Kumamon 限定禮品﹗

Kuma Bar 

地址：熊本市中央區下通 1 丁目 7-14 號パラミビル 2 樓
電話：096-227-6959
營業時間：19:00 - 2:00
定休日：週日
網址：www.kumabar.com

【日本】熊本市極高性價比火鍋店 - 鍋や tamari 熊本総本家

去旅行，我最鍾意捐窿捐罅搵食，經驗都會發掘到比旅遊書介紹更平更好食的餐廳﹗去完熊本城，去酒店 check-in 之後，就去通町筋商店街附近四圍行下，竟然喺小巷發現左一間性價比極高，勁多 local 幫襯的火鍋店﹗

經過時被大廈門外的招牌吸引就膽粗粗想去試下﹗鍋や tamari 熊本総本家位於三樓，一路上樓梯，依然覺得五十五十，但推開大門，就有種『係你喇』的感覺﹗

全木質桌椅，大大小小嘅包廂加上 Bar 檯前只有兩三張檯，空間感同私隱度都唔錯﹗入到餐廳就見到好多當地人食得津津有味咁，真係急不及待要即係拎 menu 點菜﹗

鍋や tamari 提供幾款火鍋套餐選擇，今次就點左一個豚肉四人前﹗非常抵食，套餐人圴消費百幾蚊港幣就可以由前菜食到甜品﹗

前菜有木耳配上特製汁同埋枝豆

套餐仲有包一大碟手羽先，外皮酥脆，內裡軟嫩，帶微微的辛辣，非常惹味﹗

主角嚟喇﹗豚肉整齊地圍著成個鍋排滿，上桌後職員隨即倒入清湯﹗清湯味道相當清甜可口，用嚟煮豚肉唔會搶左主角嘅味道﹗一邊食，一邊將旁邊的菜推入湯內，令湯頭愈煮愈清甜，又帶點點豚肉香味﹗

豚肉方面，油花分佈平均，每片都是厚薄適中，只需用筷子快速地在湯頭中拖二十多秒就可以﹗豚肉肉質鬆化、味道濃郁。

套餐仲附有豆腐同手打烏冬﹗豆腐非常香滑而且豆味濃郁，而手打烏冬麵條粗幼適中，咬起來非常有嚼勁﹗食到最後，手打烏冬加上清甜湯底，果種味道實在讓人回味﹗

鍋や tamari 熊本総本家

地址：〒860-0806 熊本県熊本市中央区花畑町11-20水田ビル3F
電話： 096-352-5011
Facebook 專頁：鍋や　TAMARI　熊本総本家