【日本】2015 十天九州環島自駕遊 - 行程編排 (持續更新中...)

因為 HK Express 嘅平機票，成就左今次一行 4 人嘅九州環島自駕遊。好耐未試過放十天長假，再次於  Toyota Rent-a-car  租用 Sienta ，因為夠慳油，儲物空間又夠大，日本租車資訊可以參考【日本】樂趣無窮，租車自駕遊懶人包 。今次上山下海，由福岡出發，遊盡九州。

2015 十天九州環島自駕遊行程：

Day 1  (福岡/博多)
傍晚到達福岡國際空港 -> 酒店 check-in -> 中洲屋台

住宿：博多グリーンホテル2号館

Day 2 (長崎)
一大早 Toyota Rent-A-Car 博多駅前店 pick-up 租車 -> 太宰府天滿宮 ->豪斯登堡 -> 酒店 check-in

住宿：ホテル　ウイング・ポート長崎

Day 3 (熊本)
稻佐山展望台 -> 多比良港ターミナル 乘船到長洲港ターミナル ->熊本城 -> 酒店 check-in -> 【Kumamon Square】くまモンスクエア -> 通町筋商店街 -> 晚餐 @ 鍋や tamari 熊本総本家 -> Kuma Bar

住宿：Dormy Innドーミーイン熊本

Day 4 (鹿兒島/指宿)
仙巌園 -> 指宿市営唐船峡そうめん流し -> 砂浴會館 砂樂 -> 酒店 check-in -> 天文館通

住宿：ブルーウェーブイン鹿児島

Day 5 (霧島)
鹿兒島中央駅朝市 -> 高千穂牧場 -> 霧島神宮 -> 櫻櫻溫泉 check-in

住宿：櫻櫻溫泉

Day 6 (宮崎県)
日南海岸 Sun Messe 牧場 -> 鵜戶神宮 -> 青島神社 -> 酒店 check-in

住宿：ホテル　グランディ宮崎

Day 7 (別府/湯布院)
海地獄、山地獄、鬼石坊主地獄、かまど地獄、鬼山地獄、白池地獄 -> 湯之坪商店街 -> 湯布院 -> 酒店 check-in
 
住宿：別府第一ホテル

Day 8 
金麟湖 -> 湯布院買 B-Speak 蛋糕卷 -> 九重「夢」大吊橋 -> らいおん果実園 -> 鳥栖 Premium OUTLET -> Marinoa City福岡OUTLET -> Toyota Rent-A-Car 博多駅前店還車 -> 酒店 check-in

住宿：博多 Hotel La Foresta By Ringna

Day 9
一蘭拉麵食早餐-> 麵包超人博物館  -> 運河城 -> 釣魚茶屋晚餐
 
住宿：博多 Hotel La Foresta By Ringna

Day 10
天神地下街 -> 博多買手信-> 的士去機場

【日本】九州博多區一蘭拉麵本社総本店朝聖

一蘭拉麵來自於九州，嚟到博多，點都要去下總本店朝聖啦﹗總本店係 24小時營業嘅，而且年中無休，更加唔會好似香港咁大排長龍，就算係一早去食個早餐定係半夜去食個宵夜都無問題﹗

 

一蘭拉麵總本店位於福岡市博多區中洲，搭地下鐵至中洲川端站，2 號出口，步出車站就必定會見到一整幢掛滿紅燈籠嘅建築物，絕對唔會錯過。

總本店一樓係屋台，而二樓就梗係一格格坐位，品嚐 一蘭拉麵嘅地方啦﹗

上到二樓，就會見到部自動售票機， 選擇好麵或者想追加嘅配料或飲品就可以入錢買食劵。

 

 買左食劵就可以去搵位坐低，填寫好點餐紙，選擇麵嘅硬度、湯頸嘅濃度等等之後，就可以連同食劵一齊放喺檯面，按一下紅色按鈕，店員就會開始準備拉麵。

唔知係心理影響定點，總覺得喺日本食一蘭拉麵比香港好食好多﹗經長時間熬煮而成嘅豚骨湯頭味道香濃，加上以梅頭肉造成嘅薄叉燒，又嫩又美味。仲有一蘭秘製紅辣醬，點點嘅辛辣味道令到拉麵更加惹味，食欲大增。

愛蔥嘅朋友記得要追加蔥， ¥120 四倍增量，非常震撼﹗

另外，必試日本一蘭先有嘅脂解美茶，據說食完碗拉麵之後飲番支，真係有消脂效果嫁﹗

話明嚟朝聖，最後又點可以唔買番 D 福岡店限定商品呀﹗一蘭即食麵，一 pack 有 5 包，只係賣 ¥1,290﹗

一蘭拉麵本社総本店

地址：〒810-0801　福岡県福岡市博多区中洲5-3-2

電話：092-262-0433

官方網頁：http://www.ichiran.co.jp/index_hp.html

【日本】熱砂浴初體驗 - 指宿砂樂會館

成日睇日本旅遊特輯，講溫泉區嘅時候都會介紹到砂浴，今次去到九州，終於有機會體驗下被熱辣辣嘅砂覆蓋著嘅感覺﹗指宿市距離鹿兒島大約個半鐘車程，位於指宿火山群附近，到處都係溫泉泉湧，沿岸砂灘就被地下泉脈蒸熱，更被發展成熱砂浴﹗

指宿砂樂會館擁有最著名嘅天然沙浴場，樓高三層，除左砂浴次外，亦可以浸一般嘅溫泉。

砂樂會館營業時間由朝早 8 點到夜晚 9 點，但 lunch time 時間會閉館打掃，記得留意時間﹗

砂浴浴場位於海邊，要享受熱砂浴就要先到二樓付款，入浴料金有分兩種，¥920 可以享受砂浴，而俾多 ¥610 就可以浸埋溫泉﹗另外建議用 ¥110 買條小毛巾，砂浴時包住個頭用嘅﹗

俾左入浴料金就可以落番一樓更衣室換上砂浴專用浴衣 (記得浴衣入面要真空呀﹗內衣褲都要脫掉~脫掉﹗)﹗換好衫就可以拎埋小毛巾行出去海灘果邊﹗(順帶一提，砂浴可以影相，你可以將相機交俾職員為你拍照留念﹗)

浴場位於海邊，擁有無敵海景﹗去到就會有職員過嚟帶你到砂浴池。

職員建議嘅入浴時間係大概 10 分鐘。如果過程中覺得太熱，可以動一動身體，將手腳露出。

職員挖好一個大洞俾你訓上去之後，就會開始用鏟把沙一層層咁將你埋下，只露出頭部。砂溫大約係攝氏 50-55 度之間，而覆蓋全身嘅砂大約重 20kg。砂嘅高溫加上重量，可以加速血液循環，據說可以舒緩腰痛和肩膀痛，令疲勞全消。被埋幾分鐘就已經滿頭大汗，非常過癮﹗

指宿砂樂

地址：〒891-0406　鹿児島県指宿市湯の浜五丁目25番18号
電話：0993-23-3900
營業時間：8:00am - 9:00pm
網頁：http://sa-raku.sakura.ne.jp/

【日本】夏天遊日必吃，清涼又好玩唐船峽流水麵

夏天去日本，必吃流水涼麵，鹿兒島指宿市営唐船峽流水麵係迴轉式流水涼麵的發祥地，用的流水是『日本百大名水』之一的京田湧水，水質潔淨又清涼﹗喺呢度，可以一邊享受著透心涼的涼麵，一邊聽著流水聲，感受著大自然的幸福﹗

沿路走到餐廳，環境清幽，綠葉成蔭，令人感覺好放鬆﹗

食流水麵前，先在門口點餐﹗可以選套餐或單點，套餐大約 ¥1300 - ¥1600，份量都幾大，有麵﹑飯團﹑魚生﹑味噌湯﹑燒魚等等，非常抵食﹗

指宿市営唐船峡そうめん流し 佔地非常大，但就經常爆滿﹗用餐可選室外位置，親親大自然﹗如果天氣比較凍，亦有室內座位可選。

買枝透心涼天然湧水飲下先﹗

每張檯上面都有一個迴轉流水轉台。只要將已經煮熟的素麵放入去一直轉動的水裡面，轉一圈即可撈取﹗素麵好似被冰鎮過,一樣，清爽又有彈性，搭配醬油和蔥一齊食，口味非常之夾，令人食到唔想停﹗

解釋得唔夠清楚﹖睇片啦﹗

套餐除左有流水麵可以食之外，仲有飯團﹑魚生﹑味噌湯﹑燒魚等等，兩個人 share 都唔一定食得晒呀﹗

指宿市営唐船峡そうめん流し

地址：鹿児島県指宿市開聞十町 5967 番地
電話：+81-993-32-2143
營業時間：10:00-17:00 (夏季營業時間會延長)

【日本】體驗日本上班族夜生活，博多屋台多滋味 - 中洲屋台

嚟到博多，絕對不能錯過屋台美食﹗

屋台即係日本嘅路邊流動大牌檔，係日本人放工之後去食宵夜﹑飲酒吹水嘅地方。記得細個去東京都有見過，但依家應該都在日本買少見少了﹗福岡嘅屋台主要分佈在 中洲川端、天神、長濱一帶。如果你住嘅酒店在博多駅附近，咁去中洲屋台就最方便喇﹗在博多駅乘地鐵到中洲川端駅，從 1 號出口沿著運河行大約 5 分鐘就會見到一整條屋台街。 

屋台嘅營業時間一般是從晚上 6 點到凌晨 2 點，每間屋台都係細細間，大約只有十個座位。一般屋台都會供應各式各樣嘅佐酒小吃，關東煮、串燒、魚生、拉麵、餃子，日本傳統小食都一應俱全。

沿著河邊行，經過每間屋台嘅店員都會拎住 Menu 熱情介紹，真係花多眼亂﹗隨便挑了一間屋台走進去，跟日本人擠在一起，感覺非常有趣。雖然中洲屋台算係遊客必到之地，但大部分店員都只懂簡單英文，點菜時左指指﹑右指指，確實可以獨特體驗到日本文化﹗

坐低點番個關東煮﹑炭烤串燒，再整多枝大啤﹗關東煮湯頭美味，大根吸盡湯汁，實在想食完一舊又一舊。

 炭火串燒非常惹味，而燒肉亦很有驚喜，汁多味美，肉質軟而不澀。

順帶一提，屋台價位絕唔係大家想像嘅大牌檔價錢，甚至比居酒屋貴。四個人，食左三份關東煮﹑兩份串燒加埋飲品就要 ¥8,000。雖然唔算便宜，但屋台食物美味，一場去到，體驗一下日本上班族嘅夜生活絕對值得﹗

中洲屋台

地址：福岡市中洲川端地區春吉橋

【玩樂gadget】 iNet Pocket Wifi - 日本上網好 Easy

首先感謝 U Blog 和 iNet 嘅贊助，今次一連十日嘅九州環島之旅都可以 stay connected ﹗

iNet 有兩個 pick-up points，一個中環﹑一個九龍灣。因為喺九龍返工，就選擇左九龍灣 pick up。九龍灣服務中心喺九展附近，略嫌有少少唔就腳。

去日本，iNet 提供三款唔同嘅 Pocket Wifi，如果有網絡有 preference，可以喺填寫訂單時 remarks 說明。日本收費每日只需 $70，最重要係無限上網，唔洗怕爆 data，但當然... 唔好用嚟睇片或者 download 野啦﹗

Source: 日通國際通訊有限公司

是次借用嘅係 EMobile 嘅 Pocket Wifi，體積輕便。另外，袋仔入面仲寫左 iNet 嘅 whatsapp 電話號碼，旅程中有咩問題都可以搵到幫手，實屬細心﹗

去得日本，必定日日早出晚歸，所以電池續航力非常重要。呢個 Pocket Wifi 連續使用基本上都可以用到大半日，而充電時間都唔會太耐。接 micro usb 頭充電，去到夜晚真係無電都可以直接連接 Android 手機通用嘅外置充充電。

接收方面可以話非常可靠。今次旅程上山下海，環繞九州玩左十日，除左喺海中心或者高山上收唔到次外，基本上全程連線，亦都幾流暢。就算同時 4 部手機一齊使用都無咩問題。自駕遊最怕導航搵唔到想去嘅地點，所以手機可以上網做 backup 非常重要。今次行程就試過幾次要靠 Pocket Wifi 幫手，打開 Google Map 搵路。

iNet International Limited 

http://www.inet-international.com.hk/