【掃食香港】香港都食到﹒名古屋手羽先名店 - 世界の山ちゃん

因為知道世界の山ちゃん 已經在香港開店，所以之前去日本的時候就打死都無去食。但自從之前去名古屋食過名物手羽先，就一直對果種惹味念念不忘，所以決定去世界の山ちゃん 尖沙咀分店止止渴﹗

當日預約了夜晚 7 點半，去到嘅時候已經見到有大條人龍，而用餐期間亦發現人龍不絕。由於店面唔算大，而且去到居酒屋，食客大多都會傾下計﹑飲番杯，所以提提大家，去世界の山ちゃん記得預早訂位﹗

店內全部侍應都操一口流利的日文，再加上唔少日本食客，去到世界の山ちゃん實在有置身於日本居酒屋中的感覺。世界の山ちゃん來到香港，菜單上依然提供了各款名古屋特色料理，而招牌菜『夢幻雞翼』就當然唔少得啦﹗

在世界の山ちゃん，食雞翼嘅獨門秘訣教學無處不在，就連筷子套上都有﹗卡通版﹑真人版等等，先將雞翼上下折斷，教你食雞翼點樣食得乾乾淨淨﹗

 前菜有關東煮同冷奴豆腐等等，美味非常，感覺好似是要喚醒你對日本美食的思念一樣。

夢幻雞翼一份有五隻，香口惹味，外皮香脆，內裡肉嫩﹗絕對係送啤酒嘅絕配﹗

鐵板豚肉燒，一塊塊的豚肉把底下的蔬菜蓋住，加上帶微辛的醬汁，在鐵鍋上慢慢煮熟，濃郁好味道。

即製玉子燒，蛋漿一層層煎香捲成，蛋香味濃，口感鬆軟。

居酒屋唔少得的是要飲品夠多款，世界の山ちゃん更有提供現榨汽酒，新鮮水果自己即場鮮榨，有得玩，又好飲﹗

Cashier 附近連紀念品專櫃都有，實在係將日本店所有元素都帶到香港﹗

世界の山ちゃん

地址：尖沙咀金馬倫道 57-59 號金馬倫中心地庫
電話：2723 9038

【掃食香港】Tapas size 新派中菜﹒三心兩意﹑齊齊Share - 小蝶 ZEN TOO

位於銅鑼灣登龍街的 Midtown 金朝陽中心可以話係最新搵食熱點，話題食店開完一間又一間，世界名廚 Jamie Oliver 嘅意大利餐廳﹑美式扒房 The Chop House ﹑人氣日本沾麵三田製麵所等等，長期排晒長龍﹗樓高 31 層嘅 Midtown 又點只咁少好野食，不少頂尖餐廳都已經進駐，包括位於 8 樓的小蝶 ZEN TOO。

小蝶 ZEN TOO 由著名高級中菜廳采蝶軒老闆的女兒開設，取名為小蝶，可以話係采蝶軒的年輕版。店內裝潢時尚優雅，餐具色彩繽紛，店內外都放了不少蝴蝶擺設。餐廳供應菜式非常多，而且非常創新，最特別的地方是全部均以 Tapas size 供應，細細碟﹑款多多，絕對可以滿足三心兩意的朋友，三五知己人少少都可以試到好多款菜式，真正齊齊開心Share﹗

小蝶擺盤精緻。藕斷絲蓮味道甜甜，口感獨特。

 鎮江小排骨，味道酸酸甜甜，十分開胃。

招牌菜菠蘿 - 菠蘿咕嚕肉手工精緻，將咕嚕肉釀進酥脆的菠蘿包，咕嚕肉入口外脆內嫩，甜甜酸酸的，惹味非常。以菠蘿包搭配咕嚕肉大膽創新，好有心思。

重慶石鍋豆花魚係小蝶的另一招牌菜。充滿辣勁的石鍋魚加上一桶香滑豆腐花，可以自己根據個人口味以豆花調教石鍋魚的辣度，怕太辣的話可以加入豆花中和一下辣勁。石鍋魚內的雲耳和龍脷魚柳吸盡湯汁精華，四川花椒味充斥著味蕾，非常過癮。

幾個朋友去食中菜最怕就係份量太大，叫一﹑兩樣就夠晒，小蝶 ZEN TOO 細細碟，可以叫多幾款一齊 share，而且菜式美味創新，絕對可以滿足到愛試新野嘅朋友﹗

小蝶 ZEN TOO

地址：銅鑼灣登龍街 1 號金朝陽中心二期 Midtown 8 樓
電話：2845 4555
營業時間：11 時 30 分 - 22 時 30 分
官方網頁：http://zen-too.com/

【掃食香港】瞬間回本，旋轉餐廳回歸 - The Grand Buffet 自助山

近期大熱，打開 Facebook 都會見到有朋友 share 有關澳門自助山 buffet 登陸灣仔合和中心的訊息，決定即刻去試試﹗網上面見到好多朋友都話訂座電話一直都打唔通，其實 The Grand Buffet 官方網頁有訂位專頁，填寫好聯絡電話和用餐資料就可以﹗上星期 submit 了 reservation form 之後唔洗一分鐘就有餐廳職員打電話來 confirm booking，方便快捷﹗

The Grand Buffet 位於灣仔合和中心 62樓，360 度旋轉式自助餐廳，餐廳旋轉一圈大約需要個多小時。景致一流，可以一邊品嚐美酒佳餚，一邊欣賞醉人維港靚景﹗ 見到很多人都會特別 request 窗邊座位，但如果係兩個人去的話，我會比較建議後面的梳化座位，比較舒適，雖然不是靠窗，但直望都可以望到全景﹗而且現場所見真正窗邊座位以大檯為主，二人桌會在四人桌旁邊﹗

The Grand Buffet 入面分了幾個開放式廚房 area，包括海鮮 Bar﹑中式食品區﹑天婦羅區等等﹗食物選擇非常多，而且提供唔少矜貴高檔食物，亦 refill 得好頻密，源源不絕供應，絕對不會被人搶晒就無，去 The Grand Buffet 食回本話都無咁易，保證令你捧腹而回﹗

海鮮 Bar 上佈滿麵包蟹、阿拉斯加長蟹腳﹑青口﹑攜帶子﹑凍龍蝦、等﹗另外，每日亦會提供三款即開新鮮生蠔，絕對能夠滿足一眾生蠔迷。

食海鮮一定要食最新鮮的，即撈即煮又如何﹖魚缸內養了一隻隻活羅氏蝦，即點即灼，蝦肉緊致，爽口彈 牙﹗

 即炸天婦羅表皮炸得香脆而不油膩﹗

中式食品區有燒味、粵式點心、燒乳豬、即煮粉麵等﹗點心每天下午新鮮製作，選擇多到好似去飲茶一樣，有山竹牛肉、蝦餃燒賣、韮菜餃、流沙包等等﹗燒乳豬外皮卜卜脆，肉質鮮嫩肥瘦剛好。

冷盤區有 Parma Ham、鵝肝﹑芝士﹑煙三文魚﹑各式沙律﹗

熱食區美食推介包括螺頭中式燉湯，足料燉製，配料鮮味盡入湯之中，十分滋補。仲有炆鮑魚海參亦亳不吝嗇，不停 refill﹗另外，牛扒亦值得推薦﹗以高溫烤製，肉汁被牢牢鎖緊，肉質軟嫩，肉味濃郁﹗

食到最後，點可以唔去甜品區作最後衝刺呀﹗長長的甜品 bar，放滿了各式各樣的甜品﹗金光閃閃的巨型朱古力噴泉﹑macaroon ﹑奶凍﹑木糠布甸﹑原粒朱古力、cheese cake、即製窩夫、炒雪糕等，淨係試甜品都試唔哂呀﹗

愛酒之人絕不能錯過 Wine Bar﹗自助式餐酒機提供紅白酒、香檳及日本清酒，種類多達 60 款﹗只需以 $500 購買一張儲值卡，即可以自由選擇 25ml、75ml 及150ml 的餐酒，用剩的 balance 會全數 refund﹗特別一提，插入儲值卡買酒後緊記要拿回儲值卡，因為真的很容易忘記﹗雖然職員已經提醒過，但買酒後一時興奮就忘記了﹗

The Grand Buffet 自助山

電話：2506 0888/ 2506 0666
地址：香港灣仔皇后大道東183號合和中心62樓
官方網頁：http://thegrandbuffet.hk/home

午市自助餐時間及價目：
星期一至五 (11:30 – 14:30): 成人$218 / 小童 (3至11歲) $158
星期六 (11:30 – 14:30): 成人$348 / 小童 (3至11歲) $198
星期日及公眾假期 (11:00 – 14:30): 成人$348 / 小童(3至11歲) $198

晚市自助餐時間及價目：
星期一至四 (18:30 – 22:30): 成人$598 / 小童 (3至11歲) $398
星期五、六及公眾假期前夕 (18:00 – 20:00 / 20:30 – 22:30): 成人$598 / 小童 (3至11歲) $398
星期日及公眾假期 (18:30 – 22:00): 成人$598小童 (3至11歲) $398