Work Hard! Travel Hard! : October 2014

October 27, 2014

【日本】樂趣無窮，租車自駕遊懶人包

去日本玩租車真係好方便，一來 shopping 買左幾多野都可以即刻掉上車，二來日本周圍都有好食﹑好玩﹑好睇嘅野，揸車經過就可以隨時停低，旅程嘅自由度好大。喺日本開車基本上都好安全，因為日本人揸車一般都好禮讓，而且交通標誌都會有漢字同埋英文，車內都會有GPS導航，操作非常簡單，只要輸入電話號碼，就可以搵到目的地。唯一可能會發生嘅係大城市區內塞車嘅問題，所以如果只係計劃市內觀光，交通好方便而路面交通又好繁忙嘅地區，如東京就唔適合自駕喇﹗另外，冬天日本會落雪，結冰嘅路面會增加駕駛危險，如果你駕駛經驗唔多，就唔太建議冬天自駕遊喇﹗

另外，日本長途交通車費一般都比較貴，所以如果你喺日本要穿洲過省，不論搭火車﹑巴士或飛機都會好貴。所以如果兩個人或以上去較遠嘅地方，租車自駕會比搭車便宜﹗假如決定要去日本自駕遊，就必需做好行前準備喇﹗

行前準備：

先到各大租車公司網站搵出合適嘅車款﹑quote 價錢同埋選好 pick up/return 車嘅地點做 booking。
主要租車公司：
- Nissan Rent-a-car：https://nissan-rentacar.com/tc/
- Times Car Rental：http://www.timescar-rental.hk
- Toyota Rent-a-car：http://rent.toyota.co.jp/en/index.html
- Nippon Rent-a-car：http://www.nipponrentacar.co.jp/english/index.html
列出想去嘅地方，找出去各地行車距離同埋所需時間，將目的地串聯，定好行程，最快最方便嘅可以用 Google Map，又或者日本網站 NAVITIME (http://www.navitime.co.jp/)。而我一般都會先去 Google Map 用街景圖了解下目的地周邊，有個大概印象，去到嘅時候就會更簡易搵到目的地
搵酒店，盡量選擇有免費駐車場嘅住宿地點。如果無的話，可以到 Google map 用街景圖睇下附近有無有料駐車場
去遠 D 嘅地方的話，一般利用高速公路會比較快，但要注意日本高速公路收費不便宜，去之前可以先到以下網頁估算一下：
- 西日本NEXCO：http://search.w-nexco.co.jp/
- 日本道路料金：http://www.driveplaza.com/dp/SearchTop
日本高速公路分兩種收費模式，如果喺租車嘅時候有租埋 ETC 卡就可以行 ETC 通道，好似香港嘅 AtuoToll 咁，到最後還車嘅時候先俾錢。
- 一種係劃一收費，喺公路入口就有收費亭。
- 另一種係依據路程分段收費，於公路入口張票，到離開公路嘅時候先喺收費亭俾錢。

今次名古屋 + 關西之旅行程第三日開始租車，選擇 Toyota Rent-a-car ，主要原因係因為價錢最平，另外取車亦喺酒店附近，唔需要推住行李行太遠。

網上預約好租車後，取車記得帶齊文件 (如電郵確認信﹑Passport﹑國際駕駛執照﹑信用卡)。職員會講解下 D條款同埋注意事項，之後就會同你一齊出去 check 車。

今次租用嘅係 Toyota Sienta，迷你 7 人車款，剛好適合 5 個人，車尾兩個坐位可以收起，放行李嘅空間夠晒大，放左 4 個行李都仲有好多位，血拼後多多戰利品都可以放到﹗5 日租金加上免責補償保險都只係 ¥39420，平均每日都唔洗六百蚊﹗

睇到呢張相，應該唔需要多解釋 Toyota Sienta 嘅儲物空間極限啦﹗

日本公路沿途風景好靚，藍天白雲，綠草如茵，喺日本揸車絕對係賞心樂事。

日本高速公路上每段距離都會有休息站，唔好睇少呢 D 休息站，有餐廳又有土產販賣，如果唔趕時間，不妨停低休息下﹗

一般我都會選擇喺機場還車，因為戰利品已經多到無辦法再去搭車喇﹗去機場還車非常簡單，於 GPS 輸入還車店嘅電話 number，去到附近就會見到有租車公司嘅招牌。記得要先入滿油先還車﹗

October 26, 2014

【日本】和歌山南紀白浜魚市平歎海鮮 - とれとれ市場

Toretore 海鮮巿場位於和歌山南紀白浜，由於座落於沿海位置，所以喺Toretore 海鮮巿場賣嘅大部分都係由南紀勝浦漁港直送嘅海鮮，保證新鮮﹗Toretore 海鮮巿場主要左四個 areas，活海鮮區、燒烤區、土產區同埋美食廣場。巿場內有超過 30 個海鮮檔，每檔都擺放住色澤鮮潤嘅刺身同海產，價錢亦比和歌山另一魚市黑潮市場便宜，真係花多眼亂﹗

同黑潮市場一樣，とれとれ市場內每日都定時有巨型鮪魚解剖秀，但唔同嘅係とれとれ市場有拍賣環節。師傅一邊劏魚，一邊介紹，某 D 部分更加會進行拍賣，大家都踴躍競投，非常有趣。另外，助手亦會將師傅切出嚟嘅魚即場包好，放到前面售賣。如果你想即場食，只要於付款嘅時候同佢地講話要 sashimi 就可以。師傅會幫魚生切片，大約 15-20 分鐘就拎得﹗

場內售賣嘅海產價錢非常便宜，各個檔口都會清楚表示每種海產嘅最佳食用方法。

如果想食燒海鮮，只要喺市場內購買，就可以到場外嘅燒烤燒嚟食。燒烤區收費係每人 ¥300，會提供餐具同埋簡單調味料。假如你係留宿南紀白浜，建議你買定 D 魚生番酒店慢慢歎或者做宵夜﹗

とれとれ市場亦設有土產區，選購手信一流﹗特別一提喺土產區最尾有間 cafe，售賣果肉雪條。雪條內有新鮮果肉，味道清新，而且非常足料。

とれとれ市場

地址：和歌山縣西牟婁郡白浜町堅田 2521 番地
電話：081-739-42-1010
營業時間：8：30 - 18：30
官方網頁：http://www.toretore.com/tore/index.html

【日本】南紀白浜小山丘上的外星小屋 - Toretore Village

南紀白浜位於和歌山縣嘅西南面，係日本一大好受歡迎嘅溫泉區，當中 Toretore Market 更係好多遊客都會去嘅魚市場。Toretore Village 就正正喺 Toretore Market 對面嘅小山丘上面，整個渡假村佈滿左一間間粉黃色圓頂獨立小屋，感覺就好似去左外星人基地一樣，感覺非常特別﹗

編排行程嘅時候無意中發現左 Toretore Village，本來以為佢設計咁特別，一定好貴，點知發現佢比其他白浜嘅溫泉酒店更便宜﹗Toretore Village 提供洋室及和室兩種房形，洋室可供 1 至 4 人入住，而和室就最多可以住 6 人。選住左和室，一泊朝食每人只係 ¥7,200，五百蚊港幣都唔洗，仲可以免費使用對面嘅「Tore Tore之湯」溫泉樂園。

揸車上到去，已經見到一座好奇怪嘅大型建築，原來係小賣店同埋 reception，旁邊亦有大型免費駐車場。