【掃食香港】人氣獨特八色小籠包進駐香港 - 樂天皇朝

來自新加坡嘅人氣食店樂天皇朝最近在銅鑼灣利舞臺開業，主打梗係獨家八隻不同顏色同味道嘅小籠包啦﹗

樂天皇朝空間非常寬敞，古典並冠冕堂皇，而且經常坐無虛席，如果去食晚飯的話就要早少少，平日 7 點半過後就有好多人等位，而如果需要訂位就要 7 位以上先可以。雖然裝潢佈置都非常華麗，但樂天皇朝嘅消費卻非常親民，八種口味小籠包一籠亦只係 HKD88。

八味皇朝小籠包有原味、人參、鵝肝、黑松露、芝士、蟹粉、蒜香及麻辣口味。賣相繽紛，視覺效果做足一百分﹗如果你係一個人食晒一籠，就可以依照樂天皇朝嘅最佳品嚐小 tips，由最淡味嘅原味開始食到去最濃味嘅麻辣小籠包。小籠包皮薄但唔會好易穿，用筷子輕輕夾住小籠包頂部就可以輕鬆拎起小籠包又唔怕整穿，各味嘅小籠包都注滿湯汁，而個人覺得特別滋味嘅係黑松露同鵝肝口味。

人參味清香甘甜，湯汁帶有人參湯味 ﹑鵝肝味帶出淡淡甘香口感﹑黑松露味細膩郁香，菌香味於嘴裏縈繞不散﹑芝士味咀嚼時芝士溶化於口內﹑蟹粉味以蟹肉包製而成，用料十足，湯汁特別鮮甜﹑蒜香味唔會太 over，口味調教得剛好﹑麻辣味辣味唔會太強烈，但就辛香無比。樂天皇朝嘅八味小籠包味道創新 ，令人回味無窮。

除左招牌小籠包之外，樂天皇朝亦有供應各式各樣嘅菜色。

 

 涼拌黑木耳 (HKD42)，木耳脆身爽口，伴以酸辣調味，帶有麻油香，清新醒胃。

三色瑪腦蛋 (HKD48)， 以皮蛋與鹹蛋製成，賣相非常吸引，入口溢出香濃嘅鹹蛋味，但略縑鹹蛋味過濃，淹蓋左皮蛋嘅味道。

清燉雞湯 (HKD52)， 燉盅精緻，雞湯非常足料，味道清甜，而雞肉就依然保持得嫩滑。

 四川水煮牛肉 (HKD108)，味道不錯，可惜厚切牛肉不夠嫩滑。

除此之外，樂天皇朝亦有供應多款中式甜點，當中檸檬蘆薈桂花蜜 (HKD26)清甜，加上蘆薈 QQ 口感，而檸檬蘆薈味道亦正好喺食到咁飽嘅時候消消滯。

樂天皇朝 Paradise Dynasty

地址：銅鑼灣波斯富街 99 號利舞臺廣場 6 樓
電話：2177 0903
Facebook 專頁：https://www.facebook.com/ParadiseDynastyHK

【掃食香港】觀塘工廈親民價歎盡美酒佳餚 - Friendmily

觀塘工廈 cafe 餐廳真係愈開愈多，Friendmily 就係其中一間。Friendmily 位於巧明街上嘅工業大廈 5 樓，較近觀塘地鐵站，非常方便。

店內裝修簡潔，有一個大 open area﹑梳化發位置﹑同埋大約可容納 6-8 人嘅小包廂﹗Friendmily 更提供戶外露天座位，客人可於露天位置用餐又或者預訂 Friendmily 供應嘅燒烤套餐，喺外面燒野食﹗

因為 Friendmily 店主亦有從事酒類買賣，所以喺 Friendmily 可以搵到各國原產進口嘅靚酒，種類繁多﹗啤酒方面，以德國啤酒種類最多，亦都較為特別﹗

喜歡食冷盤的話，可以叫番個海鮮拼盤，據了解 Friendmily 店主精挑堅持嚴選各地食材，生蠔更係由法國直送，而且用平民價錢就可以食到，實屬超值﹗

泰式生蝦，生蝦好鮮味，略嫌個汁唔夠辣﹗40 蚊就可以食到十隻鮮甜生蝦，抵到爛﹗

Friendmily 每天晚上都有供應 set dinner，會有餐湯﹑飲品及麵包脆條﹗麵包脆條帶點香草味，口感香脆，十分獨特﹗

 德國啤酒咸豬手配意粉，豬手香而不膩，意粉煙韌度適中﹗

西冷牛扒配薯角，無加入太多調味料，肉汁鎖住喺肉裏面 。大概是六成熟，依然保持肉質嫩滑多汁，口感不錯 。

卡邦尼燴雜菌意粉，忌廉汁 creamy 並溢出濃濃芝士香，但就唔會覺得好膩。意粉軟硬度適中，而且每條都可以充分掛上忌廉汁﹗

見到咁多唔同嘅啤酒，但第一眼就被呢枝黑色瓶身，上面有粒金星嘅啤酒吸引。一問之下，原來呢枝 Estrella Damm Inedit 係第一款專為配搭餐點設計嘅啤酒，由米芝蓮三星餐廳總廚同酒廠共同研發，沿自西班牙。

Estrella Damm Inedit 口味好獨特，有淡淡嘅花香同果香味，可以同時配搭淡味或濃味食物，最適合就係放入冰桶慢慢享用。

Friendmily

地址 : 觀塘巧明街 109 號榮昌工業大廈 5 樓 A 室
電話 : 2388 1189
官方網頁：http://www.friendmily.hk
Facebook 專頁：https://www.facebook.com/Friendmily.club

【掃食香港】深水埗麻辣干鍋香辣過癮 - 嫲嫲辣辣

第一次食麻辣干鍋係喺廣州，而香港有供應麻辣干鍋嘅餐廳應該唔會多過十間﹗之前有試過同樣以麻辣干鍋為招牌菜嘅十二味麻辣香鍋，可惜非常失望﹗喺深水埗突然想食辣野，經過福榮街見到新開嘅嫲嫲辣辣，主打川味麻辣干鍋，誤打誤撞之下就入左去試下，點知一試愛上，短短兩星期已經再去 encore﹗

「麻辣干鍋」即係無湯嘅麻辣火鍋，將所有食材加上調好嘅獨家辣醬同燈籠椒、花椒八角等香料大火快炒而成﹗煮法唔只可以鎖住食物嘅鮮味，炒香後嘅干鍋一上檯立即香氣四溢，令人食指大動。

先揀好鍋底味道，每款都有微辣到火爆辣四種辣度可選。再加入自選配料，嫲嫲辣辣提供近 50 款配料選擇，價錢由 18 蚊起，每鍋最少要點 4 款，最多可以點 9 款。

推薦必點葷菜包括田雞同雞腎，醬香味獨特，又麻又辣，非常惹味﹗素菜方面必選大豆芽﹑篙筍﹑黑木耳同蓮藕，素菜吸飽香辣醬汁，非常入味，又麻又香，刺激食慾﹗點選左小麻辣鍋底，辣度剛好，香麻辣味比例鮮明，每一樣配料都沾滿醬汁，入口先係舌尖會留有麻味，之後香辣味慢慢喺口腔滲出，突顯左麻辣火鍋少見嘅獨特麻香﹗

除左麻辣干鍋，嫲嫲辣辣仲提供多款川香小菜﹗

麻辣鴨舌 (HKD48)，鴨舌有嚼勁，麻辣口感，每隻鴨舌都好入味，佐酒一流﹗

孜然羊肉 (HKD65) ，孜然粉嘅味道，配羊肉一流﹗羊肉肉質細嫩，味道略帶鹹香，香味突出，味道香辣惹味。

食辣野配番枝青島，實屬最佳享受﹗嫲嫲辣辣人均消費大約只係一百蚊倒，而且服務非常好，絕對抵食﹗

嫲嫲辣辣

地址：深水埗福榮街 105 號地下
電話：2394 4332
營業時間：11:30-16:00；18:00-24:00