【沙巴】2014 五天沙巴陽光與海灘之旅 - 行程編排

一年前同班朋友成功搶到 AIR ASISA 去沙巴嘅平票，每人嘅機票連稅都唔洗 8 百蚊，可惜就要等足成年先有得出發﹗經過漫長嘅計劃同期待，好不容易，今年六月終於可以出發沙巴，過左五天嘅陽光與海灘之旅。

Plan 去沙巴嘅時候發現市面上同 Internet 上面講沙巴嘅資料並唔多，又或者好多人都係去到就 join 幾個唔同嘅 day tour。研究左一大輪，發現沙巴嘅 day tour 並唔平，一個 one day tour 每人就大約要上千元，我地一行五人，去一次 total 就可能要五千蚊，覺得有 D 唔抵。而且今次旅行大家都希望陽光與海灘為主，所以最後決定放棄 day tour。相反，我地決定自己出島玩，租兩日車上神山同入住位置較遠嘅 resort，住 Beach Front Pool Villa，實行五天 Hea 爆 Tanning 之旅﹗

行前準備可參考：【沙巴】自由行懶人包 - 行前準備及超實用資料

2014 沙巴陽光與海灘之旅行程：

Day 1
中午到達亞庇機場 -> Sabah Booking 預約專車接送到酒店 check-in -> 富源茶餐室食下午茶-> 沙巴市內閒逛 -> Waterfront 無名夜市食晚飯

住宿：Hotel Sixty3

Day 2
早餐叻沙 @  金明茶室 -> 行去 Jesselton Ponint Pier -> 出雙島 -> 返酒店沖涼 -> 新記肉骨茶 -> Waterfront 無名夜市食宵夜

住宿：Hotel Sixty3

Day 3
早餐叻沙 @ 馮業茶室-> 加雅街 Gaya Street weekend market/魚市場 -> 新東榮海鮮海產店預訂急凍海鮮 -> Hotel Sixty3 外 pick-up 租車 -> Nexus Resort and Spa Karambunai check-in -> 酒店晚餐

住宿：Nexus Resort and Spa Karambunai

 Day 4
晨早 6 點自駕上神山公園 -> 顛倒屋 The Upside Down House -> Lunch @ Resort -> 返 Villa 同海灘玩 -> 晚餐 @ 佳揚海鮮樓

住宿：Nexus Resort and Spa Karambunai

Day 5
早餐 @ resort -> 新東榮海鮮海產店拎急凍海鮮 -> 亞庇機場還車 -> 中午上機返香港

交通安排可參考：【沙巴】2014 沙巴陽光與海灘之旅 - 交通安排

【沙巴】自由行懶人包 - 行前準備及超實用資料

因為係一年前就左 AIR ASISA 去沙巴嘅平票，所以成個沙巴之旅嘅行程安排斷斷續續做資料搜集左一年，希望以下嘅 tips 都可以幫到你﹗

 機場：

• 如果你係坐 Air Asia，記得上落機嘅機場係機場二號 (T2) 大樓 LCCT (Low Cost Carrier Terminal)，T1 大樓同 T2 大樓相隔好遠，所以 book 車或者坐的士都記得要同司機講清楚
• 機場兌換率較差，建議可以先兌少少錢嚟坐車出 city。到左亞庇市就可以去 Wisma Merdeka，Wisma Merdeka 兌換率較高，亦有好多間 shops 可以選擇。
• 機場 -> 市中心酒店接送可參考：【沙巴】2014 沙巴陽光與海灘之旅 - 交通安排

酒店 ：

• 亞庇市好細，只要住嘅酒店係喺市中心就無需要擔心交通安排，因為好多地方﹑景點同餐廳都係 walking distance 之內。
• Hotel Sixty3 非常方便，而且房價唔貴，係亞庇市其中一個優勝嘅酒店選擇
  詳細介紹可參考：【沙巴】亞庇市內方便抵住酒店 - Hotel Sixty
• 一般 resort 都比較遠離市區，所以安排行程嘅時候最好預留時間留喺 resort 好好享受，唔好浪費左間 resort。

陽光與海灘：

• 去沙巴要出島玩其實非常容易，無需要 join 好貴嘅 day tour
  詳細介紹可參考：【沙巴】出雙島與魚兒大海中暢泳 - Sapi & Manukan Island
• 浮潛用品可以喺碼頭租，不過還是建議出發前先到淘寶買定，每個都係一百蚊內，會比較衛生。
• 出島玩盡量輕便 D ，唔好拎貴重野，因為島上無 locker﹗錢/房卡就放防水袋，可以跟身﹗
• 浮潛時唔好用麵包吸引魚游向自己，因為海灘上有禁止餵魚嘅告示，而且麵包碎屑會破壞海洋生態。
• 沙巴係世界上三大睇日落勝地之一 ，千萬唔好錯過﹗

沙巴行程總覽：【沙巴】2014 五天沙巴陽光與海灘之旅 

【沙巴】2014 沙巴陽光與海灘之旅 - 交通安排

因為 5 個人一齊去沙巴，覺得 join day tour 唔抵，所以決定自己出島玩，最後租兩日車上神山同入住位置較遠嘅 resort，住 Beach Front Pool Villa，實行五天 Hea 爆 Tanning 之旅﹗

到步：機場 -> 市中心酒店
5 個人連埋行李怕要分兩架的士，又怕要同 D 的士司機討價還價，所以就上網搵下有無得 D 機場接送嘅包車服務，最後搵到一個叫 Sabah Booking 嘅 website。

由亞庇國際機場至亞庇市區 book 一架 Van 仔都只係 MYR 70，大約係港幣 170 蚊，除番開，每人都唔洗 40 蚊，又平又方便，就決定上網預約。只要註冊成為會員，填好想預約嘅日期﹑時間﹑Flight no.同埋以信用卡網上付款都 okay﹗預約成功之後就會收到 confirmation email，email 入面亦會有個 contact no.，到左又未見到司機喺 arrival gate 外面舉名牌，只要打去問下就會有人幫你 contact 司機。

 

接送用嘅 Van 仔寬敞舒適，最多可以坐 7 個人，冷氣亦夠大，大約 20 分鐘就到達位於市中心嘅 Hotel Sixty3。

Sabah Booking

官方網頁：http://sabahbooking.com/transfers

市中心交通
其實亞庇市好細，只要住嘅酒店係喺市中心就無需要擔心交通安排，因為好多地方﹑景點同餐廳都係 walking distance 之內。

租車自駕
由於最後兩日決定入住位置較遠嘅 Nexus Resort and Spa Karambunai，所以決定最後兩日租車，順便自駕上神山公園睇下。亞庇有好多唔同嘅租車公司，大公司有 Hertz，但價錢較貴。另外，沙巴本地租車公司就有 Borneo Trails﹑AHSB Rentacar Sdn Bhd﹑KINABALU RENT A CAR SDN BHD 等。比較過後選左 KINABALU RENT A CAR SDN BHD，因為價錢較平，而且可以喺酒店門口 pick up，亞庇機場還車都唔洗收附加費，符合晒我地嘅需求。

KINABALU RENT A CAR SDN BHD 有好多唔同車款選擇，而價錢亦都好清楚 list 左喺 website 上面，只要選好想租嘅車款，填好 reservation form 俾租車公司，好快就有人 send email 俾你確認 booking details。無需預先付款，拎車果日可以俾現金或信用卡付租車費，同時亦要俾港幣 500 蚊現金做 deposit，還車果日無問題就會俾番你。

租車公司職員當日準時到達酒店，核對好文件，就會同你一齊圍住架車 check 一圈，如果發現有咩制痕都會 mark 低喺單上面。另外，車喺 pick up 嘅時候油係入滿嘅，還車嘅時候記得要先到油站入滿油先交番俾租車公司，如果唔係會收番錢嫁。（順帶一提，沙巴嘅油價非常便宜，入滿一架 7 人車都只不過需要港幣 200-300 倒，非常抵玩。)

今次 5 個人去沙巴，想坐得舒服 D，所以租左架 7 人車，兩日租車費用只係大約港幣 1200，車馬力夠，冷氣亦夠凍，又唔會好大食，上神山都無問題。兩日往來亞庇市同 Nexus Resort and Spa Karambunai 同埋上落神山，都只係入過一次油，就係臨還車之前入番滿俾租車公司果次。

KINABALU RENT A CAR SDN BHD

官方網頁：http://kinabalurac.com.my/

沙巴行程總覽：【沙巴】2014 五天沙巴陽光與海灘之旅 

【沙巴】出雙島與魚兒大海中暢泳 - Sapi & Manukan Island

來到了沙巴行重點行程之一 - 出雙島浮潛﹗去沙巴要出島玩其實非常容易，絕對無需要 join 好貴嘅 day tour，只要找到位於亞庇市中心北面嘅 Jesseltion Point 碼頭就 okay﹗

一早起身先喺酒店附近食碗 Laksa 再出發﹗估唔到是但入一間茶室食嘅 Laksa 都咁好味，非常驚喜﹗

由 Hotel Sixty3 行過去 Jesseltion Point 十分鐘都唔洗，實在要再三強調 Hotel Sixty3地理位置係幾咁優越﹗

一入到去會見到有好多 counter，好多人會向你招手，其實去邊個 counter 買飛都無咩分別，價錢亦大同小異…

之前上網做過 research，見到好多人都話 6 號嘅 Sunny Rainbow 服務好 D，所以就決定去 6 號 counter。

價錢同埋船喺各島嘅出發時間都清楚列出﹗可以自己先選定要去幾多個島同埋時間。如果有需要租借 life jacket 同浮潛用品都可以喺 counter 俾埋錢先，出到碼頭搵職員拎﹗
(包Jesseltion Point 碼頭費 - One Island RM23﹔Two Island RM33﹔Three Island RM43)

怕去晒三個島太趕，但又想去多 D 地方，所以最後決定左去雙島 - Sapi & Manukan Island﹗先去 Sapi Island，同時亦選定離開 Sapi Island 去 Manukan Island 嘅時間。

攪掂晒就可以行過去碼頭等上船﹗碼頭有好多遊客，而大家參加嘅 agent 都唔同，所以去到碼頭記得第一時間搵番 join 左果間 agent 嘅職員，俾張單佢睇，船到之後職員就識搵番你上船﹗

 碼頭旁有好多人喺度釣魚，不停上釣之餘，仲條條都大大條，非常厲害﹗ 

 坐快艇到 Sapi Island 船程大約只需要十幾分鐘。

 

落左船從 jetty 上望落海已經見到好多魚，非常興奮﹗

入島要先俾入島費 RM10。

去到沙灘，搵個位放低 D 野，就即刻衝落海玩啦﹗島上無 locker，所以出島一定要盡量輕便，貴重野就放落防水袋拎埋出去玩啦﹗

Sapi Island 水唔算好清，水底嘅珊瑚亦無繽紛色彩，但魚仔就非常活躍﹗唔需要游到特別深水嘅位置，就會有一群又一群魚仔喺你身邊穿來插去，同 D 魚仔喺海中追逐，非常有趣﹗

大約一點，Sunny Rainbow 嘅職員就過嚟提醒我地要準備上船去 Manukan Island﹗幾個島嘅距離都唔遠，幾分鐘就到！去到 Manukan Island，第一件事係先醫肚﹗見到有間 Perahu Restaurant，係度假村內嘅餐廳，就入去試下。

Perahu Restaurant 價位較貴，而食物質素亦一般，但勝在坐得舒服﹗如果唔想食島上戶外 buffet，Perahu Restaurant 可以話係唯一選擇。

食野嘅時候見到有大蜥蝪經過，大蜥蝪喺沙巴很常見，佢地自由走動，但唔會主動走近人。


Manukan Island 浪較 Sapi Island 大，魚亦無咁多，但魚會比較大條，而且水質比較清，遊客又較少，所以我鍾意 Manukan Island 多 D﹗

大約四點半就搭返船出 Jesseltion Point，一定唔可以錯過嘅係喺碼頭外飲野睇日落，天色慢慢被染紅，絕美﹗

總括而言，我認為去沙巴咁方便就可以出到 island 陽光海灘同浮潛實在比喺泰國出島更好玩，沙巴海灘亦十分乾淨，沙又夠幼，但可惜水唔夠清令浮潛美景失色不少﹗其實嚟沙巴之前上網睇過不少幾年前網友浮潛嘅相，比較起來，當時嘅水質貿實在比依家優勝好多，相信遊客帶來嘅破壞力真係太強﹗當日去左兩個島，都見到有遊客用麵包吸引魚游向自己，其實並無需要咁做﹗

• 海灘上有禁止餵魚嘅告示
• 其實魚仔相當活躍，只要你慢慢浮游，動作唔好咁大，嚇怕佢地，佢地就會不停喺你身邊游來游去
• 麵包碎屑會令海水變得愈來愈混濁

沙巴行程總覽：【沙巴】2014 五天沙巴陽光與海灘之旅  

【沙巴】抵買急凍海鮮雪條做手信 - 新東榮

喺沙巴買手信，首選一定係急凍海鮮同果味雪條﹗怕去到機場先買價錢會比較貴﹖推介去位於亞庇市中心嘅新東榮海鮮海產店﹗

新東榮喺市中心 Wisma Merdeka 對面，非常方便﹗如果你離開亞庇前唔係住喺市中心，你可以預先到新東榮先買所需嘅貨品，店員會即場幫你 pack 好放落大冰櫃，走果日經過去 pick up 就得﹗

新東榮有好多海產選擇，老虎蝦、七星斑、老鼠斑、膠、海參、大帶子… 都係非常受歡迎嘅手信。新東榮價錢合理之餘，店員都好 nice，有問必答﹗

新東榮提供幾款唔同 size 嘅虎蝦選擇，一包大過手掌嘅虎蝦大約有 4-6 隻 (RM95)，大約HKD200 就有一包，非常抵買﹗可以因應個人需要，請店員幫手搵有指定數目果包﹗

果味雪條係另一樣必買嘅手信，有多款味道，包括紅豆﹑粟米、芋頭、榴槤、牛奶﹑芒果、珍多冰、波羅蜜﹗新東榮都有賣，價錢比機場平，而且可以自己 pack 一盒內想要嘅唔同味道，不過如果你係搭 Air Asia 就必須要機場入閘後先買，否則過海關時會被沒收﹗

店員會細心幫你裁好紙箱，將所有產品包好，方便你 hand carry 上機﹗

新東榮海鮮海產店

地址：Lot G21, Wisma Sabah (Wisma Merdeka 對面)
電話：+60 88 250 818 / +60 10 954 6988
營業時間：星期一至六 9:30 - 18:30；星期日及公眾假期 9:30 - 16:00

沙巴行程總覽：【沙巴】2014 五天沙巴陽光與海灘之旅  

搭 Air Asia 的話，必須要機場入閘後先買果味雪條﹗RM27.8 一盒，一盒有 12 條，另外必須加購一個 RM3 蚊嘅膠袋先可以拎上機﹗假如買 5 盒或以上，可免膠袋錢﹗雪條會以發泡膠箱 pack 好，店員話可以保存 7 小時。

由於入閘後就只有呢間店有賣雪條，所以人非常多，建議早 DD 入去買﹗俾左錢之後店員會俾張號碼牌你，上機之前過去拎就得﹗