【深圳美食】平民價錢﹑五星級服務 - 海底撈火鍋

於中國大陸有多家分店嘅海底撈火鍋，賣嘅除左係有水準嘅食物之外，重點亦放左喺服務身上。食物又平又有水準，仲可以享受五星級服務，實在令人一試愛上﹗

自從同朋友去過海底撈火鍋一次之後，幾乎每次返大陸玩都要去海底撈滾滾佢﹗海底撈喺深圳有三間分店，一間喺羅湖火車站附近，一間喺南山區，而我最經常去嘅就係位於地鐵會展中心附近卓越世纪商場分店﹗因為卓越店距離皇崗較近，打完邊爐搭的士過皇崗口岸返香港非常方便﹗

深圳海底撈火鍋三間分店都係 24 小時營業，但就經常性客似雲來，晚飯時間更經常爆滿，等位分分鐘要等個幾兩個鐘﹗不過海底撈火鍋為你減低等位嘅痛苦，因為每間海底撈都設有等候區，為顧客準備左一系列嘅消遣，包括任食水果同點心﹑任飲茶水﹑免費 WIFI﹑撲克牌﹑飛行棋﹑象棋，三五知已坐埋一齊等位玩遊戲打發時間話都無咁易﹗仲未夠，唔緊要，海底撈火鍋仲提供免費美甲服務，女士們等位嘅時候仲可以去修下甲添﹗難怪大家都唔介意喺海底撈『慢慢等』﹗

到差唔多有位嘅時候，店員會送上一部 iPad 俾你點菜﹗點菜 app 非常清楚咁 list out 晒不同嘅湯底﹑火鍋料﹑飲品等﹗最可取嘅地方係海底撈提供可以 order 半份嘅選擇，人少少又咩都想試都無有怕﹗

點好之後，仲可以去『我的菜單』到睇番自己點左 D 咩，Total 埋單幾錢等，一目瞭然﹗

海底撈最出名嘅五星級服務並唔無浪得虛名。入座後照顧周到嘅服務員就會立即過嚟打點，每人派一條圍裙﹑套好椅上面嘅褸﹑長頭髮嘅女士會獲發橡筋﹑帶眼鏡嘅就會有眼鏡布等﹗如果你放手機喺檯面，服務員就會俾個透明袋你將手機入好﹗可以話全面考慮度打邊爐時會發生嘅各種情況，等你可以放心咁享受美食﹗

打邊爐嘅醬料都好重要，海底撈嘅水果吧除左放左多多種水果同小食之外，仲有多種醬料俾你揀﹗海鮮醬、沙茶醬、菌王醬、XO醬、香辣醬、酸甜醬、麻油、腐乳、蔥蒜等一應俱全﹗

海底撈另一個優點係非常衛生，鍋底以包裝密集，到上桌嘅時候，服務員先會打開包裝，將濃湯倒出嚟﹗ 可以選鴛鴦鍋底 (RMB68)，白湯部分揀左菌湯，湯頭好清，但就有香濃菇味﹗另一邊係香辣湯，唔算好辣，但就有 D麻香，麻而不辣，食得好過癮﹗

海底撈嘅食材都非常新鮮，大部份都係以保鮮紙包好先拎出嚟﹗食材選擇好多，仲有 D 特別嘅火鍋料可以選擇。

蟹黃墨魚滑 (RMB33 @半份)，將墨魚滑釀喺蟹蓋入面，彈牙墨魚滑吸左蟹嘅鮮味，特別香甜。

元貝滑 (RMB20 @半份)，將元貝調味後打成滑，再放番上貝殼上桌，精緻之餘，仲有啖啖元貝鮮味。

滑類組合 (RMB60 @ 1份)，花多眼亂唔知點揀，叫呢個組合就岩晒，有墨魚滑﹑蝦滑﹑牛肉滑等，全部都鮮嫩彈牙﹗

如果你食羊，內蒙羔羊肉 (RMB24 @ 半份)﹑羊排卷(RMB30 @ 半份)都一定要點，口感細嫩，啖啖羊肉香同香辣湯底非常 match。

蔬菜方面，選擇都好多，而且同香港食到嘅菜相比，海底撈供應嘅蔬菜更加鮮甜。

每次去海底撈，仲會特別 order 撈面 (RMB7 @ 1條)﹗師傅會行到你旁邊，即場表演拉面，份量不多，但 RMB 7 有表演睇，又有好味嘅面條食，實在係抵到爛﹗

海底撈嘅服務員都非常親切，用餐期間有咩需求都會立即更進處理，又會經常遞上抹手嘅熱毛巾，基本上每次當你有咩需要嘅時候，一抬頭，就會有服務員衝埋嚟幫你﹗另外不得不提嘅係海底撈個洗手間，洗手台附近會有服務員 standby，當你由廁所出嚟，佢就會即刻幫你開水龍頭，再遞上抹手紙，even 會為你遞上潤膚液。唔單止咁，洗手間仲提供左牙線、梳、GEL同香水等，可以話比酒店更齊全﹗

海底撈火鍋
官方網頁：http://www.haidilao.com/index.html

【掃食香港】將軍澳平歎酒店 high tea - 晉薈

近年流行 weekend 去 High Tea，將小點﹑甜品放喺三層架上面，再配一杯香濃咖啡或茶，三五知己傾下計﹑食下野就消磨左一個下午。High tea 價錢愈來愈貴，而位於將軍澳嘅九龍東智選假日酒店就走親民路綫，晉薈及稻聯手推出下午茶套餐都只係 HKD88 一位，價錢比起好多 cafe 仲要平，非常抵食﹗

要到晉薈，其實非常方便，只要搭地鐵到將軍澳地鐵站，POPCORN 出口再上二樓，找Gordanlo轉入小巷就會見到翡翠拉麵小籠包，上晉薈嘅升降機就喺右手邊﹗

晉薈環境幾好，一整排落地玻璃令室內光線非常充足，空間感亦都唔算，絕對係傾計嘅好地方。

望出去係 POPCORN 外嘅休憩公園，令人感覺好悠閒。

 每位只需 HKD88 嘅 high tea set，仲包一杯飲品，只可以講一句『物超所值』﹗

High tea 一定要享受番杯好茶，晉薈提供英國紅茶名牌 TWININGS 茶包，多款口味選擇。

一般 high tea 提供嘅食物包括 Scones、三文治同甜品，但晉薈就有一點點不一樣，橢圓形三層架上面分別放左鹹吃、蛋糕同埋甜點。

最高層有米芝蓮一星食府阿鴻小吃招牌滷水鵝肝配法包同埋稻出品嘅煙三文魚同熟蝦壽司。壽司味道清新，又唔會好 heavy，比起一般 high tea 提供 Scones同三文治更好。

煎香左嘅滷水鵝肝放喺香脆法包多士上面，加上沙律醬、蕃茄同洋蔥，入口感覺輕型，一D都唔覺得膩。假如你想食出阿鴻招牌滷水鵝肝嘅美味，建議你將沙律醬、蕃茄同洋蔥夾走，就可以品嚐到甘香味濃嘅滷水鵝肝。

中層有六款蛋糕，包括藍莓撻、芒果芝士蛋糕、紅桑莓撻、朱古力蛋糕、火龍果撻同藍莓芝士蛋糕，全部都係帝苑餅店嘅出品，水準絕對有保證。蛋糕細細件，亦唔會太甜，唔會太膩，岩晒下午茶食。各款水果撻造型精緻，味道配搭得好好，撻心吉士香滑。

最底層有三款晉薈秘製甜點，包括兩款中式甜點芋泥酥同驢打滾，以及日式紅豆燒餅。芋泥酥呈均勻的金黃色，外層香脆鬆化，而裡面嘅芋泥柔軟紮實，可惜未有太突出嘅芋頭香味。而驢打滾就以糯米皮包裹住紅豆蓉，煙煙韌韌，又唔會太甜。
日式紅豆燒餅，燒餅夾著份量適中嘅紅豆蓉餡，但未知係咪因為燒餅涼左嘅關係，燒餅皮有DD變硬，下次可以試下先食燒餅。

起身就去食 high tea，怕個 tea set 唔夠飽﹖唔緊要，因為晉薈於下午茶其間會供應部分點心同壽司。當日就叫多左一客加洲卷同嫩雞煨麵，都非常美味。

綜合而言，晉薈於假日提供嘅下午茶套餐水準高之餘，價錢亦非常親民，所以如果你 weekend 訓醒想去 High Tea，不妨去晉薈過一個寫意嘅下午。

晉薈 Jin Cuisine

地址︰將軍澳唐德街3號香港九龍東智選假日酒店2樓

電話︰2623 2333
下午茶提應時間：2:30pm - 5:20pm (逢星期六、日及公眾假期)

【掃食香港】惹味韓式燉雞 - 辛安東元祖奶奶雞

一直有聽聞旺角洗衣街嘅辛安東元祖奶奶雞經常大排長龍，仲有好多 media 爭相報導，但就一直都無試過﹗兩星期前喺 Times Square 睇完戲就去左辛安東元祖奶奶雞嘅銅鑼灣分店試下，埋單每人都係一百蚊倒，實屬抵食﹗

銅鑼灣分店喺 SOGO 附近，港鐵站 C 出口對開嘅京都廣場，location 都幾方便！食野最排要排隊等好耐，當日去到已經 9 點幾，所以去到就可以直接安排入座﹗有別於旺角分店嘅木桌椅懷舊簡樸設計，新店用左比較繽紛嘅色彩，以汽油桶做櫈，打開汽油桶蓋更可以放置隨身物品，袋同褸都放得入，唔洗怕吸味。店內仲播住K-pop Music，感覺好似置身韓國咁。

店內仲有鐵絲網架，模仿韓國南山塔嘅做法，俾客人可以扣上願望紙或者鎖頭。

來自韓國嘅辛安東元祖奶奶雞，其實喺亞洲已經有超過二百間分店，而老闆為左保持韓式地道風味，所以大部分材料都係由韓國運嚟香港。

辛安東元祖奶奶雞 ($128/半隻、$198/全隻) ，有無辛、小辛、中辛同激辛可以選。「奶奶雞」名字嘅由來係因為韓國人嘅祖母經常都會秘製醬料同蔬菜燉雞俾屋企人食，係當地人嘅家常小菜﹗

當日兩個人叫左半隻，用六吋大碟上檯，份量非常大，裝滿左秘製雞件、薯仔、紅蘿蔔、青瓜同水晶粉。奶奶雞嘅醬汁由二十幾種材料煮成， 雞肉依然好嫩滑，好入味，味道濃郁又惹味。另外，水晶粉煙煙韌韌，仲吸晒醬汁嘅味道同精華，辣味比其他材料更強烈，實在係愈食愈過癮﹗

如果你鐘意食葱，就一定要試下葱蛋拌飯 ($58)。將葱粒、溫泉蛋同紫菜喺石鍋入面同D飯拌勻嚟食，仲有好多飯焦，脆卜卜，好惹味。

和牛生菜包 ($88)，和牛上面放左泡菜，用生菜夾埋一齊食，咬落去好多肉汁，泡菜嘅酸酸辣辣中和左和牛嘅油膩感，加上新鮮香甜生菜，整體感覺好有層次根，非常美味。

辛安東元祖奶奶雞

NOW 含有熱門話題，最新最快電視，軟體，遊戲，電影，動漫及日常生活及興趣交流等資訊。( D  X* U8 F/ j; N8 H6 Z% H$ a- t
& V+ ~. ]7 {* Z: d' H
電話：2328 8917 
 地址：銅鑼灣駱克道491-499號京都廣場7F樓