【掃食香港】貪新鮮『一』試無妨 - Sense Dessert Cafe 分子甜品

香港甜品店多不勝數，要突圍而出真係一 D 都唔容易，元朗 Sense Dessert Cafe 就充分運用左分子料理嘅 gimmick 成為該區人氣甜品店，相信大家一聽到分子甜品已經會覺得好特別而被吸引，當你再上 Openrice 睇下，見到不同嘅食客 share 嘅盆栽 TIRAMITSU 或者出晒煙嘅甜品相，就更加一定會被吸引，相信即將衝出元朗，勇闖佐敦嘅分店都一定會人頭湧湧。 說真的，Sense Dessert Cafe 嘅甜品以創意取勝，用嚟影相真的很不錯，貪新鮮一試無妨，但一次便夠﹗   

上星期同班朋友入元朗食完飯就決定去 Sense Dessert Cafe 試試﹗去到大約 9 點半，門口企左等位嘅人群，幸好拎左飛大約十分鐘倒就可以安排到入座。Sense Dessert Cafe 以淺綠色為主調，加上木嘅桌椅，感覺都幾舒服。


Sense Dessert Cafe 提供十幾款西式甜品，以分子甜品為主打，再配上唔同嘅傳統西式甜品。聽聞盆栽 TIRAMITSU 係 Sense Dessert Cafe 嘅招牌菜之一，不過今次就無試，因為畢竟盆栽甜品都經已成行成市，無咩特別﹗點左四款甜品，每一款都非常精緻，充分滿足到大家對相機先食嘅需求。

富良野 3.7 芒果蛋黃牛乳布甸 (HKD55)，布甸香滑，可惜幾可亂真嘅芒果蛋黃切開後亳無果汁味道，令整個甜品味道變得單調。

原味梳乎厘加雪糕，梳乎厘發得又鬆又軟，味道不錯，但諗極都唔明點解應該係新鮮上檯嘅梳乎厘並唔熱，食落口只感覺到微溫，令到感覺好怪，白白浪費左個梳乎厘。

煙燻木糠布甸 (HKD50)，木糠布甸上桌嘅時候以玻璃杯蓋著，店員建議等大約兩﹑三分鐘先拎起，好等煙燻味道慢慢滲入布甸，的確非常特別。夠鐘﹑開蓋﹑放入口，木糠布甸真的充斥住濃濃嘅炭火味，但可惜煙燻味同木糠布甸格格不入，感覺好似去左火災現場一樣。

 

石板街分子雪糕 (HKD63)，上檯嘅時候冷煙瀰漫，新奇又過瘾﹗有棉花糖﹑NUTS﹑同化成碎粒嘅雲呢拿同朱古力雪糕，味道同口感都唔錯，值得一讚﹗

 

灰白心太軟 (HKD75)，另一款冷煙瀰漫嘅甜品﹗灰白係指芝麻同雲呢拿味分子雪糕，再加上綠茶心太軟。可能因為整盤太凍嘅關係，切開心太軟嘅時候無好似一般心太軟咁澎湃流心，但蛋糕鬆軟，流心抹茶味香濃﹗

Sense Dessert Cafe

地址︰元朗鳳攸南街9號好順利大廈地下2號
電話︰2886 0499
營業時間︰星期一至日:15:00-00:00
Facebook 專頁：https://www.facebook.com/pages/Sense-Dessert-Cafe/399018096836748

【曼谷】Central Would 內平價新派泰菜 - บ้านหญิง(Baan Ying) Cafe & Meal

幾乎每次去 Bangkok 都會去 Chit Lom Big C 果邊行下，除左水門雞飯，仲有咩好食﹖其實   Central World 入面都有好多唔同嘅餐廳﹗上次去 Bangkok 就去左位於 Central World 3F 嘅 บ้านหญิง Cafe & Meal 食 lunch，餐廳裝修幾靚，食物亦相當有水準，最重要係好抵食，埋單每人都係HKD60倒﹗下次行開 Central World，想食得平但又唔想食街邊檔食到大汗疊細汗，而又想食到好味泰菜，不彷去 บ้านหญิง(Baan Ying) Cafe & Meal 試試﹗

บ้านหญิง Cafe & Meal 主打新派泰式料理同埋招牌自選蛋包飯。店內嘅木桌椅簡樸設計，令人感覺放鬆舒服。

 炎炎夏日，飲番杯新鮮生果冰沙或者冰凍咖啡，夠晒透心涼﹗

泰式香葉炒辣肉碎飯，辣肉碎以大火炒成，好有鑊氣，香氣十足，又唔會過鹹。加上九層塔同辣椒，用嚟伴飯又辣又開胃，食慾大增﹗

泰式清雞湯，湯好清，雞味濃郁，而湯入面嘅雞脾肉依然好嫩滑，加上清甜而且吸入左雞湯味嘅蘿蔔，溫和又不膩口。

黃咖哩雞配油鬆餅，除左有雞肉之外，仲有青豆同茄子等蔬菜，黃咖哩辣中略帶甜，口感豐富，香料味濃。可惜油鬆餅造得唔夠鬆，食起嚟有D過於厚實。

บ้านหญิง(Baan Ying) Cafe & Meal

地址：Central World 3F

【曼谷】由朝住到晚﹒抵住河邊靚酒店 - Chatrium Hotel Riverside Bangkok

一般酒店嘅退房時間都係中午十二點，即使 request late check-out，極可能都係安排到下晝一﹑兩點。剛剛去潑水節個 trip，最後一日搭凌晨機返香港，一早起身 check-out 左的話真係有排 hea，好彩最後搵到 Chatrium Hotel Riverside Bangkok，Check-in 時間最早可以去到 8am，而退房時間就可以去到 8pm，真係好似俾一晚價錢，住左兩晚咁，享盡酒店設施﹗而且 Chatrium Hotel 房間同泳池嘅 view 都一流，感覺好優閒 relax﹗房價由 Baht 3400 起，絕對超值﹗

Chatrium Hotel 位於昭披耶河河畔，喺 Asiatique 河邊夜市附近，比較遠離市區。Chatrium Hotel有接駁船往來 BTS Saphan Taskin 站，而且班次好密，直到午夜都有船，五分鐘都唔駛就可以到達酒店。接駁船嘅船頂會見到好大個 Chatrium 招牌，所以唔駛擔心會搭錯船。

未介紹酒店房間同設施之前，先講講 service﹗步入 Chatrium Hotel 去櫃檯 check-in，服務人員態度非常友善親切，更會親自帶你到所屬房間，續一介紹唔同嘅酒店同房內設施。整個 check-in 過程，已經為 Chatrium Hotel 加晒分﹗

 

Chatrium Hotel 每間客房都設有露台，河景房可以俯瞰優美河景，城市景房可以遠眺曼谷市中心，只要將窗簾拉開，落地玻璃讓你可以喺房入面唔同嘅地方都睇到外面嘅景色，又可以出露台吹吹微風，令你可以完全沉醉於悠閒嘅氣氛之中。

 

深色嘅木製家具，Apartment 式嘅房間設計，空間感十足﹗

 客房設備齊全，更有一個簡單 open kitchen 及小餐桌，煮食爐、微波爐、冰箱、餐具一應俱全。

浴室有浴缸亦有企缸，熱水﹑水壓等都非常足夠，浸浴一流﹗

房內有兩部冷氣，相信唔需要再多解釋客房有幾大了吧﹗冷暖自由操控， 床軟硬適中，攤喺床前嘅小梳化睇電視亦非常舒服。

 

一向去旅行都起唔到身食早餐嘅我，專登一早起身落樓食早餐，因為最遲可以 8pm 先 check-out，大把時間，食完可以上樓再訓過﹗食早餐嘅位置於河邊，可以選擇室內或室外座位﹗嚟到曼谷 Riverside，梗係要坐外面啦﹗

早餐選擇非常多，有一個麵包房，唔同嘅麵包整齊排列，更有即叫即做嘅 omelette﹑湯麵﹑粥﹑pancake，味道亦都好好食﹗

8pm 先 check-out，食完上房訓個覺，再落去泳池曬太陽同游水，唔洗趕，勁 relax﹗

 

Chatrium Hotel 主要有三個泳池，包括兒童池﹑infinity pool 同埋水力按摩池﹗長型 infinity pool 又靚又夠大，泳池嘅盡頭係曼谷昭披耶河，可以欣賞河景﹗游水之外亦可以望住個河景浸下按摩池，令你壓力全消﹗

除此之外，Chatrium Hotel 亦設有 POOL BAR，可以隨時叫番杯野飲同小食，攤喺沙灘椅上面曬下太陽﹗要點餐的話，可以直接過去POOL BAR，又或者示意服務員過去沙灘椅就可以﹗傍晚嘅時候住響泳池邊睇日落更加係非常靚﹗

 

Chatrium Hotel Riverside Bangkok

地址：28 Charoenkrung Road, Watprayakrai Bangkholame, Bangkok 10120 Thailand
電話：+66(0) 2307 8888
訂房：
官方網頁： http://chatrium.com/chatrium_hotel/