韓流大熱，食韓國菜嘅餐廳間間都大排長龍﹗聽聞分別喺銅鑼灣同尖沙咀都有分店嘅 BBQ7080 提供嘅韓燒非常地道，而且長期爆滿，一定要去試下﹗突登預早一星期訂位，但尖沙咀店已經 fully booked，銅鑼灣店亦只有晚上 9 點後嘅訂位。一行 6 人，真係好想去試試，就一於 9 點後都殺﹗
星期五晚上 9 點，準時到達，lift 門一打開就見到企滿左等待安排座位嘅人。驟眼一睇，店入面大概只係得二十張檯倒，相信唔預早訂位的話，都幾難等到 walk-in。
BBQ7080 老闆係是韓國人，店名7080係指七八十年代嘅意思，牆上以韓國七八十年代電影海報壁畫布置，加上天花吊落嚟嘅伸縮抽風管，好有韓式懷舊風味。侍應亦大部分係韓國人，有置身韓國嘅感覺。枱櫈亦仿照韓國大排檔設計，餐枱唔算好大，最特別係以汽油桶做櫈，打開汽油桶蓋更可以放置隨身物品，袋同褸都放得入，唔洗怕吸晒 D 油煙味。
座位上面已經放好左一碟碟嘅醬汁，而店員亦會隨即送上前菜。
前菜有三款，包括泡菜﹑波菜同埋蓮藕，食完想再要的話，可以請店員添加。除此之外，每人亦會有一碟凍洋蔥絲同埋一碗海帶凍湯。凍湯入口帶酸，開胃之餘，亦可消解油膩感覺。
 |
| 除此之外，BBQ7080 更會提供一樽冰凍麥茶，同樣可以消解燒肉嘅油膩感覺。 |
 |
| 食韓燒，點可以唔整番罐 hite 啤酒呢?! |
BBQ7080 提供嘅食材用料大部分都係由韓國直送，而韓國人最鐘意食嘅內臟都有供應，款款新鮮。
 |
| 薄切牛舌，燒幾秒已經食得，入口鮮嫩 |
 |
| 原條五花腩肉，放喺爐中間燒出肥油，厚切嘅肉入口好爽，口感極佳。 |
 |
| 用生菜包埋五花腩肉同洋蔥絲一齊食，一D油膩嘅感覺都無。 |
 |
| 韓國地道燒烤會提供不同嘅內臟，而 BBQ7080 亦有供應牛胃。第一次食牛胃，估唔到咁好食，味道香濃，非常有咬口 |
 |
| 雞腎爽脆，唔會好韌。 |
 |
| 牛肋骨肉質柔嫩富彈性，就咁睇好似無醃過咁，但咬落去就食到好香嘅肉味同汁，惹味又Juicy。 |
 |
| 豬腸好巨形，清理得好乾淨，無任何異味。爽口彈牙，內層脂肪非常香。 |
 |
| 將豬腸剪到細細粒，口感更佳。 |
埋單每人大約二百蚊，以咁嘅價錢就食到地道韓燒風味，再加上咁好嘅服務同食物質素，實在十分超值。
BBQ7080
地址：銅鑼灣登龍街 28 號永光中心2樓
電話：3904 3693
